సెకనుకు 2 లక్షల సంక్షిప్త సందేశాలు

ఒక్క రోజులో మీరు ఎన్ని ఎస్ ఎం ఎస్ లు పంపుతారు? లేదా ఒక్క నెలలో ఎన్ని సందేశాలు పంపుతారు? 
భావ వ్యక్తీకరణకు సంక్షిప్త సందేశానికి (ఎస్సెమ్మెస్‌) మించిన సాధనం లేదని భావిస్తున్న రోజులు ఇవి. ఎస్ ఎం ఎస్ ల సంఖ్య రోజు రోజుకు చాంతాడులా పెరిగిపోతోంది. ఇపుడు ప్రతి సెకనుకు 2 లక్షల సంక్షిప్త సందేశాలు ఇతరులకు చేరుతున్నాయని ఐక్య రాజ్య సమితి (ఐరాస) దూర ప్రసార సంస్థ వెల్లడించింది. మూడేళ్లలో ఇది మూడు రెట్లు పెరిగిందని పేర్కొంది. 2007లో 1.8 ట్రిలియన్‌ సంక్షిప్త సందేశాలు నమోదయ్యాయి. అది 2010 వచ్చేసరికి 6.1 ట్రిలియన్‌ దాటింది. వీటి కోసం ప్రజలు సెకనుకు రూ.6.20 లక్షలు ఖర్చు చేస్తున్నారు. 2009 లెక్కల ప్రకారం సంక్షిప్త సందేశాలతో కాలం గడిపేవారిలో ఫిలిప్పీన్స్‌, అమెరికన్లు ముందున్నారు.

Read More

రోజూ బాదం.. దరిచేరదు జ్వరం

బాదం గింజలు బలవర్థకమైన ఆహారమే కాదు.. తరచూ వచ్చే జలుబు, జ్వరాలకు దివ్యౌషధంగా పనిచేస్తాయని తాజా అధ్యయనం స్పష్టం చేస్తోంది. రోజూ బాదం గింజలు తినడం ద్వారా శరీరంలో వైరల్‌ ఇన్‌ఫెక్షన్లపై పోరాడే శక్తి పెరుగుతుందని తెలిపింది. బాదం పైపొర రోగనిరోధక శక్తిని పెంచుతుందని ఇటలీలోని పాలీక్లినికో వర్సిటీ శాస్త్రవేత్త గైసెప్పినా చెప్పారు. తెల్లరక్తకణాల సామర్థ్యాన్ని పెంచడంతోపాటు శరీరంలో వైరస్‌ల వ్యాప్తిని అరికట్టడంలోనూ బాదం పాత్ర కీలకమని వివరించారు. గింజలు పూర్తిగా అరిగిపోయిన తర్వాత కూడా వాటి ప్రభావం ఉంటుందన్నారు. ''బాదం పైపొట్టు రోగనిరోధక శక్తిని పెంపొందిస్తుంది. జలుబు, జ్వరంపై ఇవి అద్భుతంగా పనిచేస్తాయి'' అని తెలిపారు.

Read More

'డిస్కవరి' యాత్రలో ఎలుకలు

అమెరికా అంతరిక్ష పరిశోధన సంస్థ (నాసా) వ్యోమనౌక డిస్కవరీ అంతరిక్షంలోకి చివరిసారిగా పయనమైనప్పుడు 16 ఎలుకలు ప్రయాణమయ్యాయి.  అంతరిక్ష యాత్రల వల్ల వ్యోమగాముల రోగనిరోధకశక్తి తాత్కాలికంగా క్షీణించడానికి కారణాలను వెతికి పట్టుకునే ప్రయోగంలో భాగంగా వీటిని రోదసిలోకి పంపుతున్నారు. అంతరిక్ష యాత్రల కారణంగా వ్యోమగాముల్లో రోగనిరోధక శక్తి తగ్గిపోయి. వైరస్‌, బ్యాక్టీరియాల ఇన్ఫెక్షన్ల బారిన పడడాన్ని నాసా 25 ఏళ్ల నుంచి గమనిస్తోంది. తాజా ప్రయోగాన్ని టెక్సాస్‌ విశ్వవిద్యాలయంతో పాటు నాసాకు చెందిన ఏమ్స్‌ రీసెర్చ్‌ సెంటర్‌ నిర్వహిస్తున్నాయి.

Read More

ఒక్కరి నుంచి 2 టన్నుల కార్బన్‌డైఆక్సైడ్‌

తీసుకునే ఆహారం కారణంగా మనిషి ఏటా రెండు టన్నుల బొగ్గుపులుసు వాయువు (కార్బన్‌డై ఆక్సైడ్‌)ను విడుదల చేస్తాడని ఒక అధ్యయనంలో తేలింది. ''మనిషి తీసుకునే ఆహారం నుంచి ఏటా రెండు టన్నుల చొప్పున కార్బన్‌డై ఆక్సైడ్‌ విడుదల అవుతుంది. మనిషి నుంచి విడుదలయ్యే వాయువుల్లో దీనిది 20 శాతంగా ఉంటుంది'' అని ప్రధాన పరిశోధకుడు ఇవాన్‌ మౌజ్‌ తెలిపారు. స్పెయిన్‌కు చెందిన ఆల్మెర్‌ వర్శిటీ చేసిన పరిశోధనా ఫలితాలను 'జీవన చక్రం - అంచనాలు' అన్న అంతర్జాతీయ పత్రిక ప్రచురించింది. 

Read More

చందమామపై జలచక్రం

చంద్రునిపై పుష్కలమైన నీటి వనరులతో పాటు జలచక్రం (వాటర్‌సైకిల్‌) కూడా ఉందని నాసా శాస్త్రవేత్తలు పేర్కొన్నారు. నీటివనరులు జల, వాయు, ఘన రూపాల్లోకి మారుతూ నీటి నిల్వలను స్థిరంగా ఉంచటాన్ని జలచక్రం అంటారని  మనకు తెలుసు కదా. జీవం ఉనికికి జలచక్రం కూడా ఒక ముఖ్యమైన అంశం. ఎల్‌క్రాస్‌, ఎల్‌ఆర్‌ఓ అనే రెండు ఉపగ్రహాల ద్వారా నాసా  చందమామపైనా జలచక్రం కొనసాగుతున్నట్టు గుర్తించింది. ఈ రెండు ఉపగ్రహాల నుంచి దూసుకెళ్లిన రాకెట్లు చంద్రునిపై ఎన్నడూ సూర్యకాంతి పడని'కాబియస్‌' అనే లోయను గత ఏడాది అక్టోబర్‌ 9న ఢీకొన్నాయి. ఆ తాకిడివల్ల ఎగసిన 10 మైళ్ల ఎత్తు ధూళి మేఘాన్ని ఉపగ్రహాల్లోని పరికరాల ద్వారా నాసా శాస్త్రవేత్తలు విశ్లేషించారు. ధూళిమేఘంలో స్వచ్ఛమైన మంచు స్ఫటికాలు, హైడ్రోజన్‌వాయువు, అమ్మోనియా, మీథేన్‌ తదితర రసాయనిక సమ్మేళనాలున్నాయని గుర్తించారు. వూహించినదానికన్నా అధిక నీరు చంద్రునిపై ఉందని నాసా పేర్కొంది. చంద్రునిపైకి వెళ్లే వారికి అవసరమైన జల, ఇంధన అవసరాలు వీటి ద్వారా తీరుతాయని ముఖ్యశాస్త్రవేత్త ఆంథోనికొల్‌ప్రిట్‌ తెలిపారు.

Read More

కొత్త జాతుల మలేరియా దోమలు

ఆఫ్రికాకు చెందిన భయంకరమైన రెండు జాతుల మలేరియా దోమలు జన్యుపరంగా తేడాలున్న రెండు కొత్త జాతులుగా రూపాంతరం చెందుతున్నట్లు లండన్‌ ఇంపీరియల్‌ కళాశాలకు చెందిన పరిశోధకులు కనుగొన్నారు. మలేరియాతో జరిపే పోరుపై ఈ ఆవిష్కరణ ప్రభావం చూపనుంది. ఆఫ్రికాలో మలేరియా వ్యాప్తికి కారణమైన అనోఫెలెస్‌ గాంబియా అనే దోమలపై లండన్‌ ఇంపీరియల్‌ కళాశాలకు చెందిన పరిశోధకులు అధ్యయనం చేశారు. ఈ దోమలకు చెందిన రెండు జాతులు వాటి జన్యుపరిణామ క్రమంలో వేగంగా విడిపోతున్నట్లు కనుగొన్నారు. దీంతో ఎప్పటికప్పుడు వ్యాధి నివారణకు కొత్త ఔషధాలను కనుక్కోవాల్సిన అవసరం ఏర్పడుతోంది. ''దోమల్లో అత్యంత వేగంగా కొత్త జాతులు పుట్టుకొస్తున్నట్లు మా పరిశోధనలో తేలింది. ఓ జాతి నివారణ పద్ధతి మరో జాతి దోమలపై సమర్థంగా పనిచేయడం లేదు'' అని పరిశోధన బృందం సభ్యుడు మారియా లానిక్‌జాక్‌ తెలిపారు. 

Read More

చర్మకణాల నుంచి రక్తం తయారీ

రక్తమార్పిడి తప్పనిసరైన లుకేమియా తదితర వ్యాధుల చికిత్సలో ఉపయోగపడే  ఓ సరికొత్త విధానాన్ని శాస్త్రవేత్తలు ఆవిష్కరించారు. మెక్‌మాస్టర్‌ విశ్వవిద్యాలయానికి చెందిన మూలకణ, క్యాన్సర్‌ పరిశోధనా కేంద్రం శాస్త్రవేత్తలు భారత సంతతికి చెందిన శాస్త్రవేత్త మిక్‌భాటియా సారథ్యం లో ఈ విజయం సాధించారు.  ఈ విధానం బాగా ప్రాచుర్యంలోకి వస్తే శస్త్రచికిత్సలు, ఇతరత్రా రక్తమార్పిడి అవసరమైన సందర్భాల్లో ఎవరి రక్తాన్ని  వారే ఉపయోగించుకుని స్వస్థత పొందవచ్చని శాస్త్రవేత్తలు విశ్లేషిస్తున్నారు. ఈ విధానంలో సేకరించిన మానవ చర్మకణాలను నేరుగా రక్తంగా రూపాంతరం చెందిస్తారు. ఇది మూలకణాల ద్వారా రక్తం తయారీ ప్రక్రియ కంటే సులువైన విధానమని శాస్త్రవేత్తలు వెల్లడించారు. అయితే, కేవలం యౌవన ప్రాయంలో ఉన్న వ్యక్తులనుంచి సేకరించే చర్మకణాలు మాత్రమే వినియోగించాల్సి ఉంటుందని తెలిపారు.

Read More

డ్రైవర్‌ అక్కర్లేని కారు

డ్రైవర్‌ అక్కర్లేని కారు తయారీలో గూగుల్‌ నిమగ్నమైంది. అంతర్జాల దిగ్గజం గూగుల్‌  ఇంటర్ నెట్ ఉపయోగించే ప్రతి ఒక్కరికి తెలుసు. డ్రైవర్‌ అవసరం లేకుండా తనంతట తానే సొంతంగా నడిచే కారును రూపొందించే పనిలో  గూగుల్‌  ఇపుడు నిమగ్నమైంది. గూగుల్‌ ప్రయోగాత్మకంగా రూపొందించిన 7 కార్లు మానవ ప్రమేయం లేకుండానే 1000 మైళ్లు ప్రయాణించినట్లు 'న్యూయార్క్‌ టైమ్స్‌' పత్రిక వెల్లడించింది. ఆర్టిఫిషియల్‌ ఇంటెలిజెన్స్‌ సాఫ్ట్‌వేర్‌ సాయంతో నడిచే ఈ కారు తనకి సమీపంలో ఏమున్నా గ్రహిస్తుంది. దానికి అనుగుణంగా స్వయంగా నిర్ణయం తీసుకొంటుంది.

Read More

తాటాకు చప్పుళ్ళకు కుందేళ్ళు బెదరవు

  
    * 1 తంగేడు పూచినట్లు
    * 2 తంటల మారి గుఱ్ఱముకు తాటిపట్టె గొరపం
    * 3 తండ్రి త్రవ్విన నుయ్యి అని అందులో పడి చావవచ్చునా
    * 4 తోచీ తోయనమ్మ తోటికోడలు పుట్టింటికి వెళ్ళినట్టు
    * 5 తంబళి తన లొటలొటే గాని, యెదటి లొటలొట యెరగడు
    * 6 తక్కువ నోములు నోచి ఎక్కువ ఫలము రమ్మంటే వచ్చునా
    * 7 తగినట్టే కూర్చెరా తాకట్లమారి బ్రహ్మ
    * 8 తగిలిన కాలే తగులుతుంది
    * 9 తగు దాసరికీ మెడ పూసలకూ, అమ్మకన్న కాన్పుకూ అయ్య ఇచ్చిన మనుముకూ
    * 10 తడక లేని ఇంట్లో కుక్క దూరినట్లు
    * 11 తడిగుడ్డలతో గొంతులు తెగకోస్తాడు
    * 12 తడిశిగాని గుడిశె కట్టడు, తాకిగానీ మొగ్గడు
    * 13 తడిశిన కుక్కి బిగిశినట్టు
    * 14 తడిశి ముప్పందుం మోశినట్టు
    * 15 తణుకుకు పోయి మాచవరం వెళ్ళినట్లు
    * 16 తద్దినము కొని తెచ్చుకొన్నట్టు
    * 17 తనకంపు తనకింపు, పరులకంపు తనకు వొకిలింపు
    * 18 తన కలిమి ఇంద్రబోగము, తనలేమి లోకదారిద్ర్యము
    * 19 తన కాళ్లకు బంధాలు తానే తెచ్చుకొన్నట్టు
    * 20 తనకు అని తవ్వెడు తవుడు వుంటే, ఆకటి వేళకు ఆరగించవచ్చును
    * 21 తనకు కానిది గూడులంజ
    * 22 తగువెలా వస్తుంది జంగందేవరా అంటే బిచ్చం పెట్టవే బొచ్చుముండ అన్నాడుట
    * 23 తడి గుడ్డతో గొంతులు కొయ్యడం
    * 24 తండ్రికి తిండి లేక తవుడు తింటుంటే కొడుకొచ్చి కోవాబిళ్ళ కావాలన్నాడట
    * 25 తంతే బూరెల బుట్టలో పడ్డట్టు
    * 26 తనది కాకపోతే కాశీదాకా దేకమన్నాడట
    * 27 తమలపాకుతో నీవొకటిస్తే తలుపు చెక్కతో నేనొకటిస్తా
    * 28 తమ్ముడు తమ్ముడే పేకాట పేకాటే
    * 29 తల లేదు కానీ చేతులున్నాయి... కాళ్లు లేవు కానీ కాయం ఉంది?
    * 30 తల ప్రాణం తోకకి వచ్చినట్లు
    * 31 తొండ ముదిరి ఊసరవెల్లి అయినట్టు
    * 32 తల్లి కడుపు చూస్తుంది, పెళ్ళాం జేబు చూస్తుంది
    * 33 తవుడు తింటూ వయ్యారమా?
    * 34 తాగిన మందు ఉంచుకొన్నదాని పొందు ఎలాంటి పనైనా చేయిస్తుంది
    * 35 తాను వలచినది రంభ, తాను మునిగింది గంగ
    * 36 తా(ను) పట్టిన కుందేటికి మూడే కాళ్లు
    * 37 తానొకటి తలిస్తే దైవమొకటి తలిచాడట
    * 38 తాంబూలాలిచ్చేశాను, ఇక తన్నుకు చావండి
    * 39 తాజెడ్డ కోతి వనమెల్లా చెరిచింది
    * 40 తాటాకు చప్పుళ్ళకు కుందేళ్ళు బెదరవు
    * 41 తాడిచెట్టెందుకెక్కావంటే, దూడ గడ్డికోసమన్నాడంట
    * 42 తాడిచెట్టు కింద మజ్జిగ తాగినా కల్లు అంటారు
    * 43 తాడిని తన్నే వాడుంటే వాడి తలను తన్నే వాడుంటాడు
    * 44 తాతకు దగ్గులు నేర్పినట్టు
    * 45 తాదూర సందు లేదు, మెడకో డోలు
    * 46 తానా అంటే తందానా అన్నట్లు
    * 47 తామరాకు మీద నీటిబొట్టులా
    * 48 తాను దూర సందు లేదు తలకో కిరీటమట
    * 49 తిని కూర్ఛుంటే కొండలైనా కరుగుతాయి
    * 50 తింటే గారెలే తినాలి,వింటే భారతమే వినాలి
    * 51 తిండికి తిమ్మరాజు, పనికి పోతరాజు
    * 52 తిండికి ముందు,తగాదాకు వెనుక ఉండాలి
    * 53 తిక్కల వాళ్లు తిరుణాళ్లకెళ్తే ఎక్కనూ దిగనూ సరిపోయిందట
    * 54 తిట్టను పోరా గాడిదా అన్నట్టు
    * 55 తిట్టే నోరు, తిరిగే కాలు , చేసే చెయ్యి ఊరకుండవు
    * 56 తిన మరిగిన కోడి దిబ్బ ఎక్కి కూసిందట
    * 57 తినగ తినగ వేము తియ్యగనుండు
    * 58 తినబోతూ రుచులు అడిగినట్లు
    * 59 తిన్నింటి వాసాలు లెక్కేయటం
    * 60 తిమింగలాలకు ఏ చేప అయితే ఏమిటి?
    * 61 తీగ లాగితే డొంకంతా కదిలినట్లు
    * 62 తుంటి మీద కొడితే పళ్ళు రాలాయి
    * 63 తూట్లు పూడ్చి... తూములు తెరిచినట్లు...
    * 64 తెలిసే వరకూ బ్రహ్మవిద్య తెలిశాక కూసువిద్య
    * 65 తేలు కుట్టిన దొంగలా

Read More

జాతీయ వారసత్వ జంతువుగా ఏనుగు

కేంద్ర ప్రభుత్వం ఏనుగును జాతీయ వారసత్వ జంతువుగా గుర్తించింది. కేంద్ర పర్యావరణ మంత్రిత్వశాఖ ఈ మేరకు ఒక ప్రకటన జారీ చేసింది. దేశంలో వ్యాపార ప్రయోజనాల కోసం ఏనుగులను చంపుతున్నారు,  దీంతో వాటి సంఖ్య తగ్గుతున్ననేపథ్యంలో ఆగస్టు 31న కేంద్ర ప్రభుత్వం 12 మంది సభ్యులతో ఏనుగుల పరిరక్షణ కోసం 'ఎలిఫెంట్‌ టాస్క్‌ఫోర్స్‌'ను నియమించింది.  ఏనుగులకు ప్రత్యేక గుర్తింపును కల్పించడం ద్వారా వాటిని సంరక్షించవచ్చని కమిటీ సభ్యులు నివేదిక ఇచ్చారు. ఇటీవల జరిగిన జాతీయ వన్యప్రాణుల బోర్డు స్టాండింగ్‌ కమిటీ సమావేశం ఈ ప్రతిపాదనలకు ఆమోదం తెలిపింది.   ''ఏనుగులు ఎన్నో ఏళ్లుగా మన సంస్కృతిలో భాగం. పులుల లానే వీటిని సంరక్షించవలసిన అవసరం ఎంతైనా ఉంది'' అని పర్యావరణశాఖ మంత్రి జైరాం రమేష్‌ ఒక ప్రకటనలో.. పేర్కొన్నారు. వన్యప్రాణుల సంరక్షణ చట్టాన్ని సవరించేందుకు కూడా కేంద్రం సిద్ధమైంది. ఈ మేరకు పార్లమెంటు శీతకాల సమావేశంలో బిల్లు ప్రవేశపెట్టే అవకాశం ఉంది.

Read More

కొత్త గ్రహవ్యవస్థను గుర్తించిన కెప్లర్‌

కెప్లర్‌ టెలిస్కోప్‌ సుదూరాన ఉన్న ఒక గ్రహవ్యవస్థను నాసా శాస్త్రవేత్తలకు పరిచయం చేసింది. రోదసిలో భూమివంటి గ్రహాలేమైనా ఉన్నాయా అన్న దానిపై కెప్లర్‌ టెలిస్కోప్‌ అన్వేషణ జరుపుతుంది.  సూర్యునిలాగే ఉన్న ఒక నక్షత్రం చుట్టూ శని గ్రహం పరిమాణంలో ఉన్న రెండు గ్రహాలు పరిభ్రమిస్తున్నాయని పరిశోధనలో తెలిసింది. భూమి సైజుకు కొద్దిగా పెద్దగా ఉన్న మరొక గ్రహం కూడా నక్షత్రానికి కొంత సమీపంలో ఉన్నట్టు కనిపిస్తుంది. కానీ అది గ్రహమా కాదా అన్న విషయాన్ని నిర్థారించవల్సి ఉంది. అది గ్రహమే అయితే దానిపై జీవం ఉనికి ఉండే అవకాశాలు లేకపోలేదన్నారు. నాసా గత ఏడాది అంతరిక్షంలోకి ప్రయోగించిన కెప్లర్‌ టెలిస్కోపు ప్రత్యేకంగా భూమి వంటి గ్రహాలనే గుర్తిస్తుంది. నక్షత్రానికి మరీ దగ్గరగా, మరీ దూరంగా ఉండకుండా మధ్యస్థంగా ఉండే భూమివంటి గ్రహాల్లోనే జీవం ఉనికిలో ఉండే అవకాశం ఉంటుంది కాబట్టి ఈ తరహా గ్రహాల కోసం శాస్త్రవేత్తలు అన్వేషిస్తున్నారు.

Read More

చంద్రుడిపైకి రోబో

చంద్రుడిపైకి రోబో లండన్‌: అమెరికా అంతరిక్ష పరిశోధన సంస్థ-నాసా శాస్త్రవేత్తలు చంద్రుడిపైకి మరమనిషిని పంపేందుకు ప్రణాళికలు సిద్ధం చేస్తున్నారు. మరో వెయ్యి రోజుల్లో ఈ లక్ష్యాన్ని సాధించనున్నట్లు శాస్త్రవేత్తలు తెలిపారు. చంద్రుడిపై రోబో నడిచే మహత్తర సందర్భం కొత్త తరం శాస్త్రవేత్తలకు ఉత్తేజాన్నిస్తుందని వారు ఆశిస్తున్నారు. ఈ ప్రాజెక్టుపై అధికారికంగా ఆసక్తి లేకపోవడంతో శాస్త్రవేత్తలే స్వయంగా పూనుకుని విచక్షణ నిధుల్ని వాడటమే కాకుండా, ఇంజినీరింగ్‌ కంపెనీల సాయాన్ని తీసుకున్నారు. హ్యూస్టన్‌లోని జాన్సన్‌ అంతరిక్ష కేంద్రం ముఖ్య ఇంజినీర్‌ స్టీఫెన్‌ ఆల్టెమస్‌ ప్రత్యేక ఆసక్తితో ఈ ప్రాజెక్టు పట్టాలకెక్కింది. తోటి శాస్త్రవేత్తలను పోగేసి నిధుల కొరత సమస్యను వివరించి, వీలైనంత వేగంగా దీనిని పూర్తి చేయాలనే సంకల్పంతో పనులు సాగిస్తున్నారు.

Read More

రోదసిలో వాతావరణ మార్పులు

రోదసిలో వాతావరణ మార్పులు లండన్‌: వాతావరణ మార్పులు భూమ్మీదే కాదు.. అంతరిక్షంలోనూ ఉన్నాయని శాస్త్రవేత్తలు గుర్తించారు. విశ్వ ఆవిర్భావానికి కారణమని భావిస్తున్న మహావిస్ఫోటనం (బిగ్‌బ్యాంగ్‌) తర్వాత కాలంలో అంతరిక్ష వాతావరణంలోని ఉష్ణోగ్రతల్లో గణనీయమైన మార్పులు సంభవించాయని చెబుతున్నారు. బిగ్‌బ్యాంగ్‌ అనంతరం 100 కోట్ల ఏళ్ల తర్వాత రోదసిలోని వాయువుల ఉష్ణోగ్రత ఎనిమిదివేల డిగ్రీల సెల్సియస్‌ ఉండేదని, 350 కోట్ల ఏళ్ల తర్వాత ఇది 12వేల డిగ్రీల సెల్సియస్‌కు పెరిగిందని కేంబ్రిడ్జ్‌ విశ్వవిద్యాలయానికి చెందిన పరిశోధకులు గుర్తించారు. మహావిస్ఫోటనం తర్వాత అనేక కొత్త నక్షత్ర మండలాలు ఏర్పడ్డాయని.. వాటికి కేంద్రంగా ఉండే క్వాజర్లనే కృష్ణబిలాల నుంచి అతినీలలోహిత కిరణాలు పెద్ద ఎత్తున విడుదల కావటం వల్లనే ఉష్ణోగ్రతలు పెరిగి ఉంటాయని ముఖ్య శాస్త్రవేత్త జార్జ్‌బెకర్‌ తెలిపారు.

Read More

ప్రయోగశాలలో మానవ కాలేయం

ప్రయోగశాలలో మానవ కాలేయం అభివృద్ధి లండన్‌: ప్రయోగశాలలో మానవ కాలేయాన్ని శాస్త్రవేత్తలు దిగ్విజయంగా అభివృద్ధి చేశారు. రోగులకు అనుగుణంగా ప్రత్యేక అవయవాలను రూపొందించడానికి ఈ ప్రయోగం వల్ల మార్గం సుగమం అవుతుందని తెలిపారు. అమెరికాలోని వేక్‌ ఫారెస్ట్‌ ఇన్‌స్టిట్యూట్‌కు చెందిన పరిశోధకుల నేతృత్వంలోని అంతర్జాతీయ శాస్త్రవేత్తలు ఈ ఘనత సాధించారు. వీరు అక్రోటు కాయ పరిమాణంలో ఉండే కాలేయాన్ని తయారుచేశారు.

Read More

కీలక ప్రోటీను

కీలక ప్రోటీను పనితీరును గుర్తించిన శాస్త్రవేత్తలు లండన్‌: మానవ రోగ నిరోధక వ్యవస్థలో వజ్రాయుధంలా పనిచేసే ఒక కీలక ప్రోటీన్‌ పనితీరును శాస్త్రవేత్తలు తొలిసారిగా గమనించారు. పెర్ఫోరిన్‌ అనే ఈ ప్రోటీన్‌ శత్రు కణాలను హతమారుస్తుంది. అనేక రకాల వ్యాధుల నుంచి మనల్ని కాపాడుతుంది. ఎలక్ట్రాన్‌ మైక్రోస్కోపులను ఉపయోగించడంద్వారా అంతర్జాతీయ శాస్త్రవేత్తల బృందం ఈ ఘనత సాధించింది. వైరస్‌ల దాడికి గురైన కణాల్లో రంధ్రాలు పెట్టడంద్వారా ఇవి వాటిని హతమారుస్తాయి.

Read More

కాలానికి వందనం

కాలానికి వందనం కాలం సమవర్తి. ప్రపంచంలోని ప్రతి మనిషికీ రోజుకు ఇరవై నాలుగు గంటలే ఇచ్చింది. గంటకు అరవై నిమిషాలే ఇచ్చింది. ఎక్కడా తేడా లేదు. వివక్ష లేదు. కొందరు మాత్రమే ఆ సమయాన్ని సద్వినియోగం చేసుకుంటున్నారు. అపురూపంగా వాడుకుంటున్నారు. చాలామంది ఎలా వాడుకోవాలో తెలియక వృథా చేసుకుంటున్నారు. విజేతకూ పరాజితుడికీ తేడా...సమయపాలన! కాలం కథ ఏమిటో, కాలం మనకు నేర్పించే పాఠాలేమిటో, కాలాన్ని కబళించే సర్పాలేవో ఈ పుస్తకంలో మాచర్ల రాధాకృష్ణమూర్తి చక్కగా విశ్లేషించారు. 'అత్యంత విజ్ఞుడైన సలహాదారు కాలం', 'రీసైకిల్‌ చేయలేని ఏకైక వస్తువు దుబారా చేసిన కాలం', 'మనం రోజును ఎలా ఖర్చుచేస్తావో, జీవితాన్ని కూడా అలానే ఖర్చుచేస్తాం'... తదితర సూక్తులు ఆలోచింపజేస్తాయి. శైలి ఆహ్లాదకరంగా ఉంది. కాలాన్ని సద్వినియోగం చేసుకోడానికి రచయిత ఇచ్చిన చిట్కాలు ఆచరణసాధ్యంగానే ఉన్నాయి.
సమయపాలన
రచన: మాచర్ల రాధాకృష్ణమూర్తి
పేజీలు: 189; వెల: రూ.100/-
ప్రతులకు: ఎం.ఆర్‌.కె.మూర్తి
హారిక పబ్లికేషన్స్‌, ప్రకాష్‌నగర్‌
నరసరావుపేట, గుంటూరు జిల్లా.

Read More

డెంగీకి దోమకాటు!

డెంగీకి దోమకాటు!
ఏడిస్‌ ఈజిప్టీపై పోరుకు జన్యుమార్పిడి కీటకం కౌలాలంపూర్‌: ముల్లును ముల్లుతోనే తీయాలన్నట్లు డెంగీ వ్యాధిని వ్యాపింపజేసే దోమలను.. దోమలతోనే అంతంచేయాలని మలేషియా ప్రభుత్వం నిర్ణయించింది. ఇందులో భాగంగా ప్రయోగాత్మకంగా జన్యుమార్పిడి (జీఎం) చేసిన మగ దోమలను విడుదల చేయబోతున్నారు. అలోర్‌ గజా, బెంటాంగ్‌ల ప్రాంతాలను ఇందుకోసం ఎంపిక చేశారు. 4వేల నుంచి 6వేల దోమలను వచ్చే నెలలో విడుదల చేస్తారు. జీఎం దోమలు.. ఆడ దోమలను సంభోగం జరుపుతాయి. వీటికి పుట్టే దోమలు.. లార్వా దశలోనే చనిపోతాయి. ఫలితంగా డెంగీకి కారణమయ్యే ఏడిస్‌ ఈజిప్టీ దోమల సంఖ్య తగ్గుతుందని అంచనావేస్తున్నారు.

Read More

జ్ఞానపదం

పరీక్షల్లో రాకపోతే

మీకు మంచి మార్కులు,

కలెక్టర్లు కాదు, మీరు

కాగలరట క్లర్కులు!

ఆటపాటలసలేమీ

వద్దని కా దర్థం,

ఎంతో విలువైన టైము,

చేయరాదు వ్యర్థం!

వారానికి ఒక్కసారి

చాలు మీకు వీడియో,

అప్పుడపుడు వినవచ్చును

వీలయితే రేడియో!

వ్యసనంగా మారరాదు

ఇంటివద్ద టీ.వీ.

సండే ఉదయాన తప్ప

పనికొచ్చే వేవీ?

కళ్ళు ఉరిమి చూసిందని

నిన్ను క్లాసు టీచరు,

అమ్మకి మొరపెట్టరాదు,

తనొక పూరు క్రీచరు!

వచ్చే సంచిక వరకూ

చాలును ఈ పాఠం

నాకూ వేరే వున్నది

కద ఒక జంఝాటం!

- దేవీప్రియ అంకుల్‌

Read More

సంక్షేమంలో భారత్‌కు 88వ స్థానం

సంక్షేమంలో భారత్‌కు 88వ స్థానం న్యూఢిల్లీ: అభివృద్ధి, సంక్షేమాలకు సంబంధించిన ప్రపంచదేశాల జాబితాలో భారత్‌ 88వ స్థానంలో నిలిచింది. గత ఏడాదితో పోలిస్తే పదిస్థానాల దిగువకు పడిపోయింది. సంపద, స్వేచ్ఛ, ప్రజాస్వామ్యం, విద్య, వైద్యం, మౌలిక సౌకర్యాలు తదితర 89 అంశాల ఆధారంగా లండన్‌కు చెందిన లెజిటం ఇన్‌స్టిట్యూట్‌ అనే పరిశోధన సంస్థ ఈ జాబితాను ఏటా విడుదల చేస్తోంది. ఈసారి మొత్తం 110 దేశాల స్థితిగతులను పరిశీలించింది. తొలిస్థానాన్ని నార్వే కైవసం చేసుకోగా ఆ తర్వాత స్థానాల్లో వరుసగా డెన్మార్క్‌, ఫిన్లాండ్‌, ఆస్ట్రేలియా, న్యూజిలాండ్‌ నిలిచాయి. పొరుగునున్న చైనా 58వ స్థానం దక్కించుకుంది. మనదేశం విషయానికొస్తే ఆర్థికవ్యవస్థ, ప్రభుత్వపాలనకు సంబంధించి మెరుగైన స్థితిలో ఉన్నప్పటికీ.. విద్య, ఆరోగ్యం, సామాజికపెట్టుబడి, అవకాశాలు మొదలైన విభాగాల్లో మార్కులు సంపాదించుకోలేకపోయింది. ఆరోగ్యం విషయంలో భారత్‌ దారుణమైన స్థితిలో ఉందని పౌష్టికాహారాన్ని అందించటంలో, వ్యాధుల నియంత్రణలో విఫలమైందని నివేదిక పేర్కొంది.

Read More

సహ చట్టానికి సొంత చిహ్నం, వెబ్‌సైట్‌

సహ చట్టానికి సొంత చిహ్నం, వెబ్‌సైట్‌ న్యూఢిల్లీ: సాధికారత, పారదర్శకతకు మారుపేరుగా మన్ననలు అందుకుంటున్న సహ చట్టం ఇకపై సొంత చిహ్నం(లోగో), వెబ్‌సైట్‌తో ప్రజలకు మరింత చేరువ కానుంది. ఈ చిహ్నాన్ని కేంద్ర సిబ్బంది, ప్రజా ఫిర్యాదుల సహాయమంత్రి పృథ్వీరాజ్‌ చవాన్‌ గురువారం ఆవిష్కరించారు. పాలనలో జవాబుదారీతనం, ప్రజల సాధికారతకు ఈ చిహ్నం ప్రతిబింబంగా నిలుస్తుందని మంత్రి వ్యాఖ్యానించారు. దీని రూపు రేఖలు అందరికీ ఇట్టే గుర్తుండిపోతాయని పేర్కొన్నారు. సహ చట్టం వెబ్‌సైట్‌ www.rtigateway.org. in ను కూడా మంత్రి ప్రారంభించారు. సమాచారాన్ని కోరేవారు, అందించేవారు, శిక్షణ తీసుకునేవారు, సమాచార కమిషన్లు, విద్యార్థులు, విద్యావేత్తలు అందరికీ 'విజ్ఞాన ఖని'గా ఉపయోగపడేలా దీనిని తీర్చిదిద్దారు. ఇందులో డిజిటల్‌ లైబ్రరీ, చర్చావేదిక, ఈ-న్యూస్‌లెటర్‌, బ్లాగ్‌ వంటి సదుపాయాలూ ఉన్నాయి.

Read More

అంగారకునిపై శాశ్వత నివాసం

అంగారకునిపై శాశ్వత నివాసం
వ్యోమగాములు అక్కడే స్థిరపడతారు
భారీ నిధులతో నాసా కసరత్తు

వాషింగ్టన్‌: గ్రహాంతరజీవనం గురించి ఇప్పటి వరకూ కథలు, నవలల్లోనే చదివాం.. ఇంకో రెండు దశాబ్దాల్లో అది నిజం కానుంది. అంగారకునిపై శాశ్వత మానవ నివాసాలను ఏర్పాటు చేసే దిశగా నాసా కసరత్తు మొదలుపెట్టింది. దీని పేరు 'వందేళ్ల స్టార్‌షిప్‌'. దీంట్లో భాగంగా తొలిదశలో కొద్దిమంది వ్యోమగాములను అరుణగ్రహంపైకి పంపిస్తారు. వాళ్లు అక్కడే శాశ్వతంగా ఉండి జీవనం గడుపుతారు. స్వయంపోషకత్వం దిశగా అడుగులు వేస్తారు. తమ అవసరాలు తామే తీర్చుకొనే స్థాయికి చేరుకుంటారు. అప్పటివరకూ భూమిపై నుంచి ఆహారం తదితర నిత్యావసరాలను పంపిస్తూ ఉంటారు. వ్యోమగాములను తిరిగి భూమ్మీదకు తీసుకురావటం అన్నది ఆర్థికంగా సాధ్యం కాదని, కాబట్టే వాళ్లు అక్కడే ఉండేలా స్టార్‌షిప్‌నకు రూపకల్పన చేస్తున్నామని ఈ ప్రాజెక్టును చేపట్టిన నాసాకు చెందిన ఏమ్స్‌ పరిశోధన కేంద్రం డైరక్టర్‌ పీట్‌ వార్డెన్‌ తెలిపారు. స్టార్‌షిప్‌ ప్రాజెక్టు ప్రస్తుత అంచనా వ్యయం రూ.50వేల కోట్లు. ఆచరణలో మరెన్నో రెట్లు పెరిగే వ్యయం కోసం విరాళాలు స్వీకరిస్తామని వార్డెన్‌ పేర్కొన్నారు. గూగుల్‌ వ్యవస్థాపకుల్లో ఒకరైన లారీపేజ్‌తో కూడా మాట్లాడానని, ఆయన ఆసక్తి చూపారన్నారు.

నీరు ఉండటం వల్లే..: సౌరకుటుంబంలోని గ్రహాల్లో అంగారకునిపైనే నీరు ఉండే అవకాశాలు అధికంగా ఉన్నాయి. అక్కడ మనిషి స్థిరపడటానికి ఇది అనుకూల అంశం. అయితే, ఉష్ణోగ్రతల్లో తీవ్రమైన హెచ్చుతగ్గులు, ఆక్సిజన్‌ లేని వాతావరణం వంటివి మాత్రం ప్రతికూల అంశాలు. వీటిని అధిగమించాల్సి ఉంటుంది. సింథటిక్‌ బయాలజీ, మనిషి జన్యుక్రమంలో మార్పులు తీసుకురావటం వంటి ఆధునిక టెక్నాలజీల సాయంతో ఇటువంటి సమస్యలను పరిష్కరించవచ్చని వార్డెన్‌ పేర్కొన్నారు. వ్యోమగాములు మొదట అంగారకుని ఉపగ్రహాలపై స్థిరపడి.. అక్కడి నుంచి అంగారకుని వివరాలు తెలుసుకోవటానికి విస్తృతమైన పరిశోధనలు జరపాల్సి ఉంటుందన్నారు. 2030 నాటికి మనిషి అంగారకుని చందమామలపైకి వెళ్లటం సాధ్యమవుతుందని అభిప్రాయపడ్డారు.

Read More

బాలకార్మికుల గణనపై 'సుప్రీం' అసంతృప్తి

వెట్టి, బాలకార్మిక వ్యవస్థల నిర్మూలన కోసం అవసరమైన గణనను రాష్ట్రాలు చేపట్టకపోవటంపై సుప్రీంకోర్టు అసంతృప్తి వ్యక్తం చేసింది. ''ఎన్‌హెచ్‌ఆర్‌సీ సూచనల మేరకు ఈ గణన కోసం కేంద్ర పాలిత ప్రాంతాలు, రాష్ట్రాలకు కేంద్రం నిధులిస్తోంది. ఏ ఒక్క రాష్ట్రామూ దీనిని చేపట్టలేదు'' అని ప్రధాన న్యాయమూర్తి కపాడియా.. న్యాయమూర్తులు కె.ఎస్‌.రాధాకృష్ణన్‌, స్వతంతర్‌ కుమార్‌లతో కూడిన ధర్మాసనం పేర్కొంది. బాల కార్మికులపై సర్వే చేయకపోతే నిధులు ఎందుకు విడుదల చేస్తున్నారని కేంద్రాన్ని ప్రశ్నించింది. తమ ఉత్తర్వులు అమలు చేయకపోతే.. ఆదేశాలు జారీచేయటాన్ని ఆపేస్తామని ధర్మాసనం ఆగ్రహం వ్యక్తం చేసింది. వెట్టి, బాల కార్మికవ్యవస్థ నిర్మూలన కోసం తీసుకోవాల్సిన చర్యలపై 1985లో దాఖలైన వ్యాజ్యంపై సుప్రీం విచారణ చేపట్టింది.

Read More

పిండి కొద్దీ రొట్టె

సామెతలు...
తెలుగు సాహిత్యంలో సామెతల కేమీ కొదవ లేదు. నగర జీవి మరిచిపోయినా ఈ సామెతలు పల్లె జనం నోళ్లలో నేటికీ నానుతూ ఉన్నాయి. జంతువులు, చెట్లు, వ్యవసాయం..... ఇలా ఎన్నో విషయాల గురించి విలువైన సమాచారాన్ని సామెతల్లో నిక్షిప్తం చేశారు మన పూర్వీకులు. అటువంటి సామెతల నుంచి కొన్నిటిని ఇక్కడ ఇస్తున్నాం.
    * 1 పంచపాండవులెందరంటే మంచం కోళ్ళలాగ ముగ్గురు అని రెండు వేళ్ళు చూపినట్లు
    * 2 పగటి ముచ్చట పని చేటు
    * 3 పండిత పుత్ర పరమ శుంఠ
    * 4 పండితపుత్రుడు... కానీ పండితుడే...
    * 5 పందికేంతెలుసు పన్నీరు వాసన
    * 6 పచ్చకామెర్లోడికి లోకమంతా పచ్చగా కనిపిస్తుంది
    * 7 పని లేని మంగలి పిలిచి తల గొరిగినట్లు
    * 8 పని లేని మంగలి పిల్లి తల గొరిగినట్లు
    * 9 పనిగల మేస్త్రి పందిరి వేస్తె కుక్క తోక తగిలి కూలిపొయింది
    * 10 పప్పు దాటినాక నందైతేనేమి పందైతేనేమి
    * 11 పరుగెత్తి పాలుతాగే కంటే,నిలబడి నీళ్ళు తాగటం మేలు
    * 12 పరువం మీద వున్నపుడు పంది కూడా అందంగా ఉంటుంది
    * 13 పల్లాన పండింది; మెరకన ఎండింది; వాడికుప్ప కాలింది; వాడి అప్పుతీరింది. అయితే ఎవరు వాడు?
    * 14 పళ్లూడగొట్టుకోడానికి ఏ రాయైతేనేమి?
    * 15 పావలా కోడికి ముప్పావలా దిష్టి
    * 16 పాడిందే పాడరా పాచిపళ్ళ దాసుడా!
    * 17 పాపమని పాత చీర ఇస్తే ఇంటి వెనక్కు వెళ్ళి మూరేసుకుందట
    * 18 పాలు, నీళ్ళలా కలిసిపోయారు
    * 19 పిండి కొద్దీ రొట్టె
    * 20 పిచ్చి కుదిరితే కానీ పెళ్ళి కాదు, పెళ్లి అయితే గానీ పిచ్చి కుదరదు
    * 21 పిచ్చి తగ్గింది నీకంటే, తలకు రోకలి చుట్టమన్నాడట
    * 22 పిచ్చి పలురకాలు వెర్రి వేయి రకాలు
    * 23 పిచ్చెమ్మ తెలివి వెర్రెమ్మ మెచ్చుకోవాలి
    * 24 పిచ్చోడి చేతిలో రాయి
    * 25 పిచ్చోడికి పింగే లోకం
    * 26 పిల్లకాకికేం తెలుసు ఉండేలు దెబ్బ
    * 27 పిల్లికి బిచ్చం పెట్టనివాడు
    * 28 పుండుకు పుల్ల మొగుడు
    * 29 పుట్టుకతో వచ్చిన బుద్ది, పుడకలతో గానీ పోదు
    * 30 పుడుతూ పుత్రులు పెరుగుతూ శత్రువులు
    * 31 పుణ్యం కొద్దీ పురుషుడు, దానం కొద్దీ బిడ్డలు
    * 32 పుర్రెకో బుద్ధి జిహ్వకో రుచి
    * 33 పులిని చూసి నక్క వాతలు పెట్టుకున్నట్లు
    * 34 పుల్లయ్య వేమారం(వేమవరం) వెళ్ళొచ్చినట్లు
    * 35 పెదవులతో మాట్లాడుతూ నొసలతో ఎక్కిరించటం
    * 36 పెట్టే వాడు మన వాడైతే ఎక్కడ కూర్ఛున్నా ఫర్వాలేదు
    * 37 పెనం మీద నుండి పొయ్యిలో పడ్డట్టు
    * 38 పెరుగుట విరుగుట కొరకే
    * 39 పెళ్ళికి వెళ్తూ పిల్లిని చంకన వేసుకెళ్ళినట్టు
    * 40 పేకాట పేకాటే తమ్ముడు తమ్ముడే
    * 41 పేనుకి పెత్తనం ఇస్తే తలంతా గొరిగిందంట
    * 42 పైన పటారం, లోన లొటారం
    * 43 పొట్టోడికి పుట్టెడు బుద్దులు
    * 44 పొమ్మనలేక పొగపెట్టినట్లు
    * 45 పొయ్యి దగ్గర పోలీసు
    * 46 పొరుగింటి పుల్లకూర రుచి
    * 47 పెళ్ళీకి పందిరి వెయ్యమంటే చావుకి పాడి కట్టినట్టు

Read More

శబ్ద కాలుష్యానికి అడ్డుకట్ట

శబ్ద కాలుష్యానికి అడ్డుకట్ట
వచ్చే దీపావళి నాటికి ప్రత్యేక వ్యవస్థ న్యూఢిల్లీ: వచ్చే దీపావళి నాటికి శబ్ద కాలుష్యాన్ని పర్యవేక్షించే విస్తృత నెట్‌వర్క్‌ దేశవ్యాప్తంగా అమలులోకి రానుంది. కేంద్ర కాలుష్య నియంత్రణ మండలి దీనిని ఏర్పాటు చేయనుంది. ముఖ్యంగా నగరాలు, పట్టణాల్లోని జనసమ్మర్ధం ఉండే ప్రాంతాల్లో పరిసర శబ్ద స్థాయిలను నియంత్రించేందుకు ఈ వ్యవస్థను ఏర్పాటు చేస్తున్నారు. ఇందుకోసం దేశవ్యాప్తంగా 160 శబ్ద నియంత్రణ కేంద్రాలను నిర్మిస్తారు. ''వచ్చే దీపావళి నాటికి వ్యవస్థ సిద్ధం అవుతుంది. దేశంలో ఏ ప్రాంతంలో శబ్ద కాలుష్యం స్థాయిలు ఏవిధంగా ఉన్నాయన్న వాస్తవ కాల సమాచారాన్ని ఈ ప్రత్యేక వ్యవస్థ అందిస్తుంది'' అని సీపీసీబీ ఛైర్మన్‌ ఎస్పీ గౌతం వెల్లడించారు.

Read More

ఇద్దరు సూర్యుల గ్రహం

ఇద్దరు సూర్యుల గ్రహం
భూమికి 49 కాంతి సంవత్సరాల దూరంలో దర్శనం
కనుగొన్న అంతర్జాతీయ శాస్త్రవేత్తలు

వాషింగ్టన్‌: ఇద్దరు సూర్యుళ్లు కలిగిన ఒక భారీ గ్రహాన్ని అంతర్జాతీయ శాస్త్రవేత్తలు కనుగొన్నారు. మాములు గ్రహాలకు భిన్నంగా దీనికి రెండు సూర్యాస్తమయాలు, సూర్యోదయాలు ఉంటాయి. వాస్తవానికి ఇది హెచ్‌ఆర్‌ 7162 ప్రాథమిక తార చుట్టూ పరిభ్రమిస్తోందని పరిశోధకులు తెలిపారు. భూమికి 49 కాంతి సంవత్సరాల దూరంలో లైరా తారామండలంలో ఇది ఉన్నట్లు గుర్తించారు. ఆస్ట్రోమెట్రీ అనే విధానం ద్వారా ఈ గ్రహాన్ని శాస్త్రవేత్తలు కనుగొన్నారు. దీని ద్వారా భూమిని పోలిన గ్రహాలను గుర్తించడానికి మార్గం సుగమమవుతుందని పరిశోధనకు నాయకత్వం వహించిన మాథ్యూ మటర్స్‌పాగ్‌ తెలిపారు. లోగడ కూడా శాస్త్రవేత్తలు జంట నక్షత్రాలున్న గ్రహాలను కనుగొన్నారు. తాజాగా కనుగొన్న హెచ్‌ఆర్‌ 7162 నక్షత్రానికి సమీపంలోనే మరో తార ఉండడం వల్ల ఈ పరిస్థితి ఏర్పడిందని వారు చెప్పారు. రెండో నక్షత్రం గురుత్వాకర్షణ శక్తి ప్రభావం పడి, గ్రహం ఆవిర్భావం సమయంలో ప్రభావం చూపి ఉంటుందని శాస్త్రవేత్తలు పేర్కొన్నారు. అయితే ఈ పరిశోధన.. గ్రహాల ఏర్పడటంపై వచ్చిన కోర్‌ అక్రిషన్‌ అనే సిద్ధాంతాన్ని విభేదిస్తోంది. ఈ సిద్ధాంతం కింద.. తార చుట్టూ పరిభ్రమించే ధూళి, వాయు రేణువులు ఒక్కటిగా అతుక్కుంటూ భారీ శిలలుగా రూపాంతరం చెందుతాయి. ఆ తరువాత ఇవే భారీ గ్రహాలకు కేంద్రకాలుగా తయారవుతాయి. ఇదంతా జరగడానికి లక్షల సంవత్సరాలు పడుతుంది. అయితే హెచ్‌ఆర్‌ 7162 వ్యవస్థ ఆవిర్భావాన్ని గమనిస్తే.. కేవలం కొన్ని వేల సంవత్సరాల్లోనే గ్రహాల ఏర్పాటుకు అవసరమయ్యే వాయువులు, ధూళిని దెబ్బతీసినట్లు అర్థమవుతోంది. ఫలితంగా ఈ పదార్థాలన్నీ దూరంగా జరిగినట్లు స్పష్టమవుతోంది. ఇలాంటి పరిస్థితిని కూడా అధిగమించి భారీ గ్రహం ఏర్పడింది.

Read More

పాఠ్య ప్రణాళికలో సమాచార, విద్యా హక్కు చట్టాలు

వచ్చే విద్యా సంవత్సరం నుంచి మారనున్న 7, 9 తరగతుల పాఠ్య ప్రణాళికలో సమాచార, విద్యా హక్కు చట్టాలు, విపత్తు నిర్వహణ తదితర అంశాలు చోటు చేసుకోనున్నాయి.   రాష్ట్ర విద్యా పరిశోధన, శిక్షణ సంస్థ (ఎస్‌సీఈఆర్‌టీ) ఈ విషయానికి సంబంధించి అధ్యయనం చేస్తోంది. సమాచార హక్కు చట్టంపై విద్యార్థులకు అవగాహన పెంపొందాల్సిన అవసరాన్ని తెలియజేయడంతో పాటు చట్టం ప్రయోజనాలు, దరఖాస్తు చేసుకునే విధానం తదితర అంశాలను పాఠ్య ప్రణాళికలో చేర్చేందుకు అధికారులు ప్రయత్నిస్తున్నారు.

ప్రతికూల వాతావరణ పరిస్థితుల వల్ల రాష్ట్రం లోని పలు  ప్రాంతాలు తరచూ కరవు కోరల్లో చిక్కుకుని విలవిల్లాడుతున్నాయి. మరోవైపు తుపాన్లు, సునామీ, వరదలు వంటి విపత్తులు ఎప్పుడు విరుచుకుపడతాయో తెలియని పరిస్థితి. ఈ నేపథ్యంలో  విద్యార్థులకు విపత్తులు, వాటి ప్రభావం వంటి  అంశాలపై అవగాహన పెంపొందించటానికి  రాష్ట్ర ప్రభుత్వం పాఠ్య ప్రణాళికలో 'విపత్తు నిర్వహణ' అంశాన్ని చేర్చేందుకు సిద్ధమైంది. పౌరులకు రాజ్యాంగ హక్కులు- బాధ్యతలు, బుద్ధిమాంద్యం, పర్యావరణం తదితర అంశాలకూ ప్రాధాన్యం ఇవ్వాలని నిర్ణయించారు.

జాతీయ స్థాయిలో తీసుకున్న నిర్ణయాన్ని అనుసరించి ప్రభుత్వం దశలవారీగా 1 నుంచి 6 తరగతుల వరకు కొత్తగా పాఠ్యపుస్తకాలు రూపొందించింది. ప్రస్తుతం 7 నుంచి 10 వ తరగతి వరకు పుస్తకాలు మార్చే ప్రయత్నాలు జరుగుతున్నాయి. 2011-12లో 7, 9; 2012-13లో 8, 10 తరగతుల విద్యార్థులకు కొత్త పాఠ్య పుస్తకాలను అందవచ్చు. 

Read More

పసుపుతో కేన్సర్‌కు చికిత్స

పసుపులో అనేక వైద్య గుణాలు ఉన్న సంగతి మన అందరికీ తెలుసు. కేన్సర్‌ చికిత్సలో పసుపు కీలక పాత్ర పోషిస్తుందని ఇపుడు అమెరికా శాస్త్రవేత్తల పరిశోధనలో వెల్లడి అయింది.  ఈ పరిశోధన బృందానికి భారత సంతతికి చెందిన ఎరి శ్రీవత్సన్‌ నాయకత్వం వహించటం విశేషం. పసుపులో ఉండే కర్కుమిన్‌ అనే పదార్థాన్ని సిస్ల్పాటిన్‌ అనే ఔషధంతో కలిపితే, కేన్సర్‌ చికిత్సకు ఇచ్చే కీమోథెరపీ సామర్థ్యం పెరుగుతుందని అమెరికాలోని కాలిఫోర్నియా విశ్వవిద్యాలయానికి చెందిన శాస్త్రవేత్తలు కనుగొన్నారు.  మెదడు, మెడ కేన్సర్‌ చికిత్సలో ఇది సాయపడుతుందని వారు తెలిపారు. పసుపు వాపు, మంటలను తగ్గిస్తుందని రుజువైంది. కొన్ని రకాల కేన్సర్లను అణచివేస్తుందని గతం లో జరిగిన అధ్యయనాల్లోనూ తేలింది. మెదడు, మెడ కేన్సర్లు చాలా ప్రమాదకరమైనవి. వీటిని ఆలస్యంగా గుర్తిస్తే శస్త్రచికిత్సలు, కీమోథెరపీ, రేడియేషన్‌ వంటివి ఇవ్వాలి.  శ్రీవత్సన్‌, వాంగ్‌లు ఎలుకలపై నిర్వహించిన పరిశోధనలో కర్కుమిన్‌ ద్వారా మెదడు, మెడ కేన్సర్లు నయమవుతాయని తేలింది.  దీనివల్ల ఇతరత్రా దుష్ప్రభావాలు తగ్గుతాయని వివరించారు.

Read More

సున్నిత పర్యావరణ ప్రాంతంగా దండి

భారత స్వాతంత్రోద్యమంలో కీలకమైన ఉప్పు సత్యాగ్రహానికి వేదికగా నిలిచిన గుజరాత్‌లోని దండి, దానిపక్కనున్న మూడు గ్రామాలను పర్యావరణపరమైన సున్నిత ప్రాంతంగా కేంద్రం ప్రకటించింది. నవసరి జిల్లాలోని తీరప్రాంతాలైన దండి, సమాపూర్‌, మత్వాడ్‌, ఒంజాల్‌లలో సున్నితమైన పర్యావరణ వ్యవస్థలు ఉన్నాయని కేంద్ర పర్యావరణ అటవీశాఖ తన నోటిఫికేషన్‌లో పేర్కొంది. ''ఈ నాలుగు గ్రామాలకున్న చారిత్రక, పర్యావరణ ప్రాధాన్యం దృష్ట్యా ఈ ప్రాంతాన్ని పరిరక్షించడం అవసరం. దీనివల్ల గ్రామాల అభివృద్ధి, పర్యావరణ పరిరక్షణ అన్న గాంధీ సూత్రాలను కూడా పాటించినట్లవుతుంది'' అని పేర్కొంది.

Read More

వాతావరణ మార్పు వల్ల భారత్‌కే అధిక ముప్పు

వాతావరణ మార్పు వల్ల రానున్న 30 ఏళ్లలో అత్యధిక ముప్పు ఎదుర్కొనే దేశాల్లో భారత్‌ రెండో స్థానంలో ఉందని బ్రిటన్‌కు చెందిన మాప్లెక్రాఫ్ట్‌ సంస్థ తమ సర్వేలో వెల్లడించింది. పొరుగు దేశాలైన బంగ్లాదేశ్‌ మొదటి స్థానంలో, నేపాల్‌ నాలుగు, పాకిస్థాన్‌ 16, అఫ్గానిస్థాన్‌ ఎనిమిదో స్థానంలో ఉన్నాయి. 170 దేశాల్లో నిర్వహించిన ఈ సర్వేలో.. ఆసియా ప్రాంతంలోనే వాతావరణం అత్యంత దుర్భరంగా ఉన్నట్లు గుర్తించారు. జనాభా పెరుగుదల వల్ల వరదలు, తుఫాన్లు, అనావృష్టి ఏర్పడుతాయని తెలిపింది. వాతావరణంలో జరిగే స్వల్ప మార్పులు.. మానవులపై తీవ్ర ప్రభావాన్ని చూపుతాయని పర్యావరణ పరిశోధకుడు అన్నామొస్‌ తెలిపారు. నీటి వసతులు, పంట దిగుబడిపై దుష్ప్రభావం చూపడంతో పాటు సముద్ర మట్టాలు పెరిగి భూభాగాన్ని కోల్పొతామని వివరించారు.

Read More

ఏ ఎండకి ఆ గొడుగు పట్టాలన్నట్లు

సామెతలు...

తెలుగు సాహిత్యంలో సామెతల కేమీ కొదవ లేదు. నగర జీవి మరిచిపోయినా ఈ సామెతలు పల్లె జనం నోళ్లలో నేటికీ నానుతూ ఉన్నాయి. జంతువులు, చెట్లు, వ్యవసాయం..... ఇలా ఎన్నో విషయాల గురించి విలువైన సమాచారాన్ని సామెతల్లో నిక్షిప్తం చేశారు మన పూర్వీకులు. అటువంటి సామెతల నుంచి కొన్నిటిని ఇక్కడ ఇస్తున్నాం.
  * 1 ఏకులా వచ్చి మేకులా తగులుకున్నట్టు
    * 2 ఏ మొగుడు దొరక్కుంటే అక్క మొగుడే దిక్కన్నట్లు
    * 3 ఏ ఎండకి ఆ గొడుగు పట్టాలన్నట్లు
    * 4 ఏ చెట్టూ లేని చోట, ఆముదం చెట్టే మహా వృక్షము
    * 5 ఏటి ఇసుక ఎంచలేం తాటి మాను తన్నలేం, ఈత మాను విరచలేం
    * 6 ఏడ్చే దానికి మొగుడొస్తే నాకూ వస్తాడన్నట్టు
    * 7 ఏడ్చే మగాడిని నవ్వే ఆడదాన్ని నమ్మరాదు
    * 8 ఏడ్చే వాడికి ఎడమ పక్కన, కుట్టే వాడికి కుడి పక్కన కూర్చున్నట్లు
    * 9 ఏదుం తిన్నా ఏకాసే, పందుం తిన్నా పరగడుపే
    * 10 ఏరు దాటే దాకా ఓడ మల్లయ్య ఏరు దాటాక బోడి మల్లయ్య
    * 11 ఏనుగుల్ని తినే స్వాములోరికి పచ్చ గడ్డి పలహారం అన్నట్లు
    * 12 ఏనుగులు మింగేవాడికి పీనుగల పిండాకూడు
    * 13 ఏనుగు చచ్చినా బ్రతికినా వెయ్యే
    * 14 ఏనుగు నెత్తి మీద ఏనుగే మన్ను పోసుకున్నట్లు
    * 15 ఏమండీ కరణం గారూ పాతర లో పడ్డారే అంటే, కాదు మషాకత్తు చేస్తున్నాను అన్నాడట
    * 16 ఏమీ లేని విస్తరాకు ఎగిరెగిరి పడుతుంది,అన్నీ ఉన్న విస్తరాకు అణిగిమణిగి పడుంది
    * 17 ఏరు ఏడామడలుండగానే చీర విప్పి చంకన బెట్టుకొందట
    * 18 ఏరు దాటిన తరువాత తెప్ప తగలేసినట్లు

Read More

చిన్నపాటి దెబ్బలే పిల్లలకు పెద్ద పాఠాలు

లండన్,అక్టోబర్ 10: మీ పిల్లలు మోకాలి చిప్ప లు పగులగొట్టుకునో లేదా మోచేతులకు దెబ్బలు తగిలించుకునో వస్తే వాళ్లనేమీ అనకండి. ఎందుకంటే వా రి జీవితంలో 'నేర్చుకోవ డం' అనే ప్రక్రియలో అలా దెబ్బలు తగిలించుకోవడం కూ డా ఒక భాగమట. పిల్లలు చిన్న చిన్న రిస్కులు తీసుకుంటేనే మంచిదని 'హెల్త్ అండ్ సేఫ్టీ ఎగ్జిక్యూటివ్ అండ్ ప్లే ఇంగ్లం డ్' నివేదిక చెబుతోంది. పైగా ఆట స్థలాల్లో వారికి మోకాళ్లకు, మోచేతులకు దెబ్బలు తగిలేలా కొన్ని ఏర్పాట్లు ఉండాలని కూడా సెలవిస్తోంది.

ఉదాహరణకు ఎగుడు దిగుడు నే లపై పిల్లలు సైకిల్ తొక్కడం నేర్చుకోవాలట. వారికి అన్నీ స్పూన్‌తో అందించి నిర్వీర్యులను చేయకుండా వారంతట వారు కొన్ని పనులు చేయడాన్ని ప్రోత్సహించాలని నిపుణుల అభిప్రాయం. ఆట స్థలాల్లో చిన్నపాటి రిస్కులు తీసుకునే అ వకాశం లేకుంటే.. బాలబాలికలు నిజజీవితంలో రిస్కులు తీసుకుని ప్రమాదంలో పడతారని వా రు హెచ్చరిస్తున్నారు.

Read More

సముద్రగర్భంలో భారత్ ఆర్‌వోవీ

న్యూఢిల్లీ, అక్టోబర్ 10: మనుషుల అవసరం లేకుండానే సముద్రగర్భంలో ప్రయాణించే జలాంతర్గాములను మన దేశమూ రూపొందించి చూపింది. ఈ జలాంతార్గాములను రిమోట్‌లీ ఆపరబుల్ వెహికిల్(ఆర్‌వోవీ) అని పిలుస్తున్నారు. సముద్ర ఉపరితలంపై ఒక నౌక నుంచి వీటిని నియంత్రిస్తారు. వీటిని ఇప్పటి వరకూ అమెరికా, ఫ్రాన్స్, జపాన్, రష్యా, చైనా మాత్రమే రూపొందించాయని నేషనల్ ఇన్‌స్టిట్యూట్ ఆఫ్ ఓషన్ టెక్నాలజీ డైరక్టర్ ఆత్మానంద్ చెప్పారు.

రష్యాకు చెందిన ఎక్స్‌పెరిమెంటల్ డిజైన్ బ్యూరో ఆఫ్ ఓషనాలజికల్ ఇంజనీరింగ్‌తో కలిసి ఎన్ఐవోటీ ఈ జలాంతర్గాములను రూపొందించిందని ఆయన తెలిపారు. సముద్రంలో 6000 మీటర్ల లోతున పరిశోధించే సామర్థ్యాన్ని భారత్ సంతరించుకోవడంతో, ఐక్యరాజ్య సమితి కేటాయించిన ప్రదేశంలో పాలీ మెటాలిక్ నాడ్యూల్స్‌లనే ఖనిజాలను వెతకడానికి మన దేశం ఉపక్రమించింది. అంతే కాక సముద్ర గర్భంలో ఆర్‌వోవీలు నిర్వహించే పరిశోధనల వలన అక్కడి భూమి, సాంద్రత, కరిగి ఉన్న ప్రాణవాయువు తదితర వివరాలు తెలుస్తాయి. త్వరలోనే కృష్ణా-గోదావరి బేసిన్‌లోనూ భారత్ తయారీ ఆర్‌వోవీ సర్వే నిర్వహిస్తుంది.

Read More

ప్రభుత్వ విభాగాల్లో అవినీతి

డబ్బులివ్వకుంటే ఏ పనీ కాదు!
ప్రభుత్వ విభాగాల్లో అవినీతి పెరుగుతోంది
సర్వోన్నత న్యాయస్థానం వ్యాఖ్యలు న్యూఢిల్లీ: ప్రభుత్వ విభాగాల్లో అవినీతి పెరిగిపోతుండటంపై సర్వోన్నత న్యాయస్థానం ఆందోళన వ్యక్తంచేసింది. ''దేశంలో అవినీతిపై నియంత్రణ లేకపోవడం దురదృష్టకరం. ముఖ్యంగా ఆదాయపు పన్ను, అమ్మకం పన్ను, ఎక్సైజ్‌ విభాగాల్లో అవినీతి విపరీతంగా ఉంది. డబ్బులివ్వకుంటే ఏ పనీ కాదు'' అని జస్టిస్‌ మార్కండేయ కట్జు, జస్టిస్‌ టీఎస్‌ ఠాకూర్‌తో కూడిన ధర్మాసనం తాజాగా వ్యాఖ్యానించింది. ఒక కేసులో ఆదాయపు పన్ను ఇన్‌స్పెక్టర్‌ మోహన్‌లాల్‌ శర్మను పంజాబ్‌, హర్యానా హైకోర్టు నిర్దోషిగా ప్రకటించడాన్ని సవాలు చేస్తూ సీబీఐ వేసిన అప్పీలును అనుమతిస్తూ ఈ వ్యాఖ్యలు చేసింది. సీబీఐ తరపున అదనపు సొలిసిటర్‌ జనరల్‌ పీపీ మల్హోత్రా వాదనలు వినిపిస్తూ- ఓ పన్నుచెల్లింపుదారు నుంచి ఇన్‌స్పెక్టర్‌ రూ.10 వేలు లంచం తీసుకొన్నట్లు దిగువ కోర్టు నిర్ధరించిందని, హైకోర్టు ఆయన్ను నిర్దోషిగా ప్రకటించిందని ఆక్షేపించారు. ఆయనకు దిగువ కోర్టు ఏడాది కారాగార శిక్ష విధించింది. చట్టబద్ధం చేయొచ్చుగా: అదనపు సొలిసిటర్‌ జనరల్‌ వాదన అనంతరం ధర్మాసనం స్పందిస్తూ- ''ప్రభుత్వం అవినీతిని ఎందుకు చట్టబద్ధం చేయకూడదు? అలా చేస్తే ఒక్కో పనికి ఒక మొత్తాన్ని నిర్ణయించవచ్చు. ఉదాహరణకు ఒక వ్యక్తికి ఏదైనా పనిచేసిపెట్టాలంటే రూ.2,500 అడగొచ్చు. ఈ విధానంతో ప్రతీ వ్యక్తి తానెంత లంచం ఇవ్వాలో ముందే తెలుసుకోవచ్చు. ప్రభుత్వ అధికారులకూ బేరమాడాల్సిన అవసరం ఉండదు. అయినా, పాపం అధికారులనూ తప్పుబట్టలేం.. ద్రవ్యోల్బణం పెరుగుతోంది కదా''అని వ్యాఖ్యానించింది. కోర్టులో విచారణకు హాజరైన ఇన్‌స్పెక్టర్‌- తనపై సీబీఐ అభియోగాలను తోసిపుచ్చారు. తాను అవినీతికి పాల్పడలేదని, తనకేమీ తెలియదని, ఈ కేసులో ఇరికించారని చెప్పారు. ఆయన వాదనతో ధర్మాసనం సంతృప్తి చెందలేదు. అవినీతి ముఖ్యంగా ఆదాయపుపన్ను, అమ్మకం పన్ను, ఎక్సైజ్‌ పన్ను విభాగాల్లో తీవ్రస్థాయిలో ఉందని పునరుద్ఘాటించింది.

Read More

క్షీణిస్తున్న పరాగ సంపర్కం

క్షీణిస్తున్న పరాగ సంపర్కం
భారత్‌లో కూర'గాయాల'కు కారణమిదే కలకత్తా వర్సిటీ పరిశోధనలో వెల్లడి తేనెటీగలు, సీతాకోకచిలుకలు వంటి కీటకాలు తగ్గిపోవడంతో భారత్‌లో కూరగాయల ఉత్పత్తి క్రమేణా క్షీణిస్తోందని తాజా అధ్యయనంలో తేలింది. కలకత్తా విశ్వవిద్యాలయానికి చెందిన పరిశోధకులు ఈ అధ్యయనాన్ని నిర్వహించారు. గత 45 ఏళ్లలో సాగు విస్తీర్ణం పెరిగినా.. అనేక రకాల కూరగాయల దిగుబడుల తీరు ఆందోళనకరంగా ఉందని ఇందులో వెల్లడైంది. కీటకాలు కానరాకపోవడంతో మొక్కల్లో పరాగసంపర్కం తగ్గిపోయి.. దిగుబడులు క్షీణిస్తున్నాయని పరిశోధకులు తెలిపారు. పరాగసంపర్కం అనేది సహజసిద్ధమైన ప్రక్రియ. పువ్వులోని పుప్పొడి రేణువులను కీటకాలు రవాణాచేసి, ఫలదీకరణం చెందేలా దోహదపడతాయి. ఈ ప్రక్రియ అన్ని పంటలకూ అవసరం ఉండదు. పరాగసంపర్కం అవసరమైన దోసకాయలు, వంకాయలు, గుమ్మడికాయలు, టమోటా, సొరకాయలు వంటి 11 రకాల పంటల దిగుబడుల్లో వృద్ధి రేటును పరిశోధకులు అధ్యయనం చేశారు. ఈ కూరగాయల సాగు విస్తీర్ణం 340 శాతం మేర పెరిగినా.. దిగుబడి మాత్రం 63 శాతమే పెరిగింది. అధ్యయనంలో 1963ని ప్రామాణిక సంవత్సరంగా తీసుకున్నారు. ఇదే కాలానికి సంబంధించి.. పరాగ సంపర్కం అవసరంలేని దుంపలు, అల్లం, వెల్లుల్లి, కొన్నిరకాల పప్పు ధాన్యాల దిగుబడులు సాగు విస్తీర్ణం నిష్పత్తికి అనుగుణంగానే పెరగడం గమనార్హం. ''కీటకాలు తగ్గిపోవడం వల్ల పరాగ సంపర్కం అవసరమైన పంటల దిగుబడులు తగ్గిపోయాయనడానికి ఇదే సూచిక. పరాగ సంపర్కంపై ఆధారపడ్డ పంటల దిగుబడి తగ్గిపోవడాన్ని చూస్తే ఈ ప్రక్రియకు అవసరమైన కీటకాలు కనుమరుగు కావడాన్ని సూచిస్తోంది'' అని పరిశోధనకు నాయకత్వం వహించిన ప్రతిభా బసు తెలిపారు.

Read More

'దండన లేని బోధన'

'దండన లేని బోధన' పేరిట 10.10.10వ తేదీ సాయంత్రం హైదరాబాద్‌ లోని జూబ్లీ హాలులో హెచ్‌ఎం టీవీ ఒక సదస్సును నిర్వహించింది. ఈ సదస్సులో రాజకీయ నాయకులు, విద్యావేత్తలు, ఉపాధ్యాయులు, ఉపాధ్యాయ సంఘాల నేతలు, విద్యార్థులు పాల్గొని తమ అభిప్రాయాలను వ్యక్తం చేశారు. ఈ సదస్సులో వ్యక్తమైన కొన్ని అభిప్రాయాలను ఇక్కడ అందజేస్తున్నాం.

'భయంతో బుద్ధి రాదు - బెత్తం చదువు చెప్పదు' అనే సందేశంతో రూపొందించిన పోస్టర్‌ను ప్రొఫెసర్‌ శాంతా సిన్హా ఆవిష్కరించారు. పిల్లలు, పెద్దలు సమానమేనని ఆమె ఈ సందర్భంగా అభిప్రాయాన్ని వ్యక్తం చేశారు. పిల్లలను ప్రేమించటంతో పాటు వారిని గౌరవించటం కూడా మనం నేర్చుకోవాలని ఆమె అన్నారు. పిల్లలను కొట్టే హక్కు పెద్దలకు లేదని ఆమె చెప్పారు. కార్పొరల్‌ పనిష్‌మెంట్‌ను విద్యా హక్కు చట్టం నిషేధించిందని ఆమె చెప్పారు.

1990 ప్రాంతాల్లో మానవ హక్కుల చట్టం వచ్చింది. అప్పటి నుంచే మహిళల హక్కులు, బాలల హక్కులు, దళితుల హక్కుల గురించి అందరూ మాట్లాడటం పెరిగింది. ఈ చట్టాలతో సమస్యలు తగ్గుతాయనుకొన్నాను. కానీ చట్టాలు వచ్చినప్పటి నుంచే సమస్యలు మరింతగా పెరిగాయి. ఇందుకు కారణం ఏమిటనేది మనమంతా ఆలోచించాలి.
మాణిక్య వర ప్రసాద్‌, విద్యా శాఖ మంత్రి

కొట్టక పోతే పిల్లలకు చదువు రాదని తల్లిదండ్రులు కూడ భావిస్తున్నారు. దండిస్తే పిల్లల మేధస్సు పెరగదు. దండనతో విద్యార్థులలో హింసా ప్రవృత్తి పెరుగుతుంది.
ప్రొఫెసర్‌ హర గోపాల్‌, జనరల్‌ సెక్రటరీ, సేవ్‌ ఎడ్యుకేషన్‌ సొసైటీ

క్రమ శిక్షణ, శిక్షల మధ్య వ్యత్యాసాన్ని మనం అర్థం చేసుకోవాలి.
బాల సుబ్రహ్మణ్యం, డైరెక్టర్‌, విద్యా శాఖ

లెర్నింగ్‌ డిజెబిలిటీ ఉన్న పిల్లలకు విద్య నేర్పే ఉపాధ్యాయులు మనకు లేరు. అలాగే పుట్టుకతోనే బహు ముఖ ప్రజ్ఞను కలిగి ఉన్న పిల్లలకు చదువు చెప్పగలిగే ఉపాధ్యాయులూ మనకు లేరు. ఈ రెండు రకాల పిల్లలను హాండిల్‌ చేయగలగటాన్ని ఉపాధ్యాయులు నేర్చుకోవాలి. విద్యార్థులందరికీ ఒకేలా మూస పద్థతిలో బోధించే విధానాన్నే మనం అనుసరిస్తున్నాం.
డాక్టర్‌ వీరేందర్‌, క్లినికల్‌ సైకాలజిస్ట్‌

ఇప్పటి విద్య పడగల క్రింద నడుస్తోంది. అది టీచర్లనీ, విద్యార్థులనీ కాటు వేస్తోంది. తల్లిదండ్రులు పిల్లలను కొడుతున్నారు. తల్లిని తండ్రి కొడుతున్నాడు. కొట్టటం అనేది కుటుంబంలో ఉంది, సమాజంలో ఉంది. అదే బడిలోకి వచ్చింది. దండన లేని సమాజం ఉన్నప్పుడు దండన లేని బడి ఉంటుంది. శిక్షణా? - శిక్షా అనేది హింస లేని సమాజాన్ని ఆవిష్కరించుకొన్నపుడు సాధ్యమవుతుంది.
బడిలో బడి వాతావరణం లేదు. వసతులూ లేవు. బడిని ఒక పూల తోటలా నిర్వహించాలి.
రాఘవాచారి, మోడల్‌ టీచర్‌

ఉపాధ్యాయులనే బాధ్యులను చేయటం సరికాదు
వెంకట రెడ్డి, అధ్యక్షుడు, పిఆర్‌టియు

ఉపాధ్యాయులు, విద్యార్థుల నిష్పత్తి 1:30 ఉంటే సర్వ శిక్షా అభియాన్‌లో చెప్పినట్లు ఆటపాటలతో బోధించటం సాధ్యమవుతుంది. ఒకరిద్దరు ఉపాధ్యాయులే మొత్తం పాఠశాలను కంట్రోల్‌ చేయటం కష్టం. దండన వెనుక ఉన్న కారణాలను కనుగొనాలి. ప్రభుత్వమే పరిష్కార మార్గం వెతకాలి.
వెంకటేశ్వర రావు, కార్యదర్శి, ఎపి యుటిఎఫ్‌

కక్ష తోనో, కసి తోనో ఉపాధ్యాయులు విద్యార్థులను దండించాలని అనుకోరు. ప్రభుత్వ పరంగా సదుపాయాలు, సిబ్బందిని కల్పించక పోవటం ఒక కారణం. రాష్ట్రంలో 1100 మండలాలు ఉంటే 800 మండలాలలో ఎంఇఓలు లేరు.
కె.నర్సింహా రెడ్డి, అధ్యక్షుడు, ఎస్‌టియు

ఆరేడు సంవత్సరాల క్రితం ఉపాధ్యాయుల వద్ద పనిష్‌మెంట్‌ రిజిస్టర్‌ కూడా ఉండేది. విద్యార్థులను ఎలా దండించాలి? ఎక్కడ కొట్టాలి? ఎలా కొట్టాలి వంటి వివరాలను ఉపాధ్యాయులకు తెలియజేసేవారు. అంటే దండించటం అనే దానికి చట్టబద్ధత అప్పట్లో ఉన్నట్లే కదా?
సుబ్బారెడ్డి, అధ్యక్షుడు, ఎపిటిఎఫ్‌ (1938)

ఈ పరిస్థితులకు సినిమా, మీడియా, మనం కారణం. మనం ప్రాసెస్‌ను ఎంజాయ్‌ చేయకుండా కేవలం రిజల్ట్‌ను మాత్రమే ఎంజాయ్‌ చేస్తున్నాం. సమస్యలకు ఇది ఒక కారణం.
వసతులు లేకపోవటం వల్లనే పిల్లలను కొడుతున్నారని ఉపాధ్యాయ సంఘాల నేతలు అనటం ఒకరకంగా సోషల్‌ బ్లాక్‌ మెయిలింగ్‌తో సమానం.
ప్రస్తుతం ఎవరిని రోల్‌ మోడల్‌గా తీసుకోవాలో అర్థం కాని పరిస్థితుల్లో పిల్లలు ఉన్నారు. తల్లిదండ్రులు, ఉపాధ్యాయులే రోల్‌ మోడల్‌గా నిలవాలి.
సునీల్‌ కుమార్‌, నంది అవార్డు గ్రహీత, సొంత ఊరు చిత్ర దర్శకుడు

Read More

Google Code in

Google announced Google Code-in, an open source development and outreach contest targeted at 13-18 year old students around the world.
Be sure to check out  Frequently Asked Questions about the contest for answers to your questions about participating.Google is hopes to get pre-university students from all over the world involved.  Google will announce the mentoring organizations that are participating on November 5. The contest starts on November 22, 2010!

Read More

భాగ్యనగరంలో తగ్గుతున్న గాలి నాణ్యత

కాలుష్యం కోరల్లో భాగ్యనగరం  చిక్కుకొంది. రోజురోజుకూ తగ్గుతున్న గాలి నాణ్యత ప్రజల ఆరోగ్యంపై దుష్ప్రభావం చూపుతోంది.వాయు కాలుష్యం హైదరాబాద్‌లో విపరీతంగా పెరిగిపోతున్నదని  సెంటర్‌ ఫర్‌ సైన్స్‌ అండ్‌ ఎన్విరానిమెంట్‌ (సీఎస్‌ఈ)  పేర్కొంది. నగరంలోని వాయు నాణ్యతతోపాటు, రవాణ గణాంకాలను సీఎస్‌ఈ విశ్లేషించింది. చిన్నపాటి ధూళి కణాలు (పీఎం) ఎక్కువగా ఉన్నాయని గుర్తించింది.  కేంద్ర పర్యావరణ మంత్రిత్వశాఖ వాయు నాణ్యత ప్రమాణాల ప్రకారం హైదరాబాద్‌లో వాయు నాణ్యత అధమ స్థాయికి చేరిందని సీఎస్‌ఈ పేర్కొంది. ''పాత నిబంధనల ప్రకారం నగరంలోని కొన్ని ప్రాంతాలు ఒక మోస్తరు స్థాయి కాలుష్య ప్రాంతాలుగా వర్గీకరించారు. మారిన నిబంధనల నేపథ్యంలో ఇవి తీవ్రమైన కాలుష్య ప్రాంతాలుగా మారిపోయాయి. తక్కువ కాలుష్యం ఉన్న ప్రాంతాలు అధిక కాలుష్య స్థాయికి చేరాయి'' అని నివేదిక వివరించింది. అక్టోబర్ 7 గురువారం నాడు  జరిగిన ఒక రౌండ్‌టేబుల్‌ సమావేశంలో సీఎస్‌ఈ ఈ మేరకు ఒక నివేదికను విడుదల చేసింది. 2003లో సరాసరి వార్షిక పీఎం10 స్థాయి 66 ఎంజీ/సీయూఎం మేర ఉండేది. 2009లో అది 80 ఎంజీ/సీయూఎంకు పెరిగిందని నివేదిక వెల్లడించింది. అత్యధిక కాలుష్య ప్రాంతంలో ఉండాల్సిన ప్రమాణం కన్నా ఇది 1.3 రెట్లు ఎక్కువని సీఎస్‌ఈ అసోసియేట్‌ డైరెక్టర్‌ అనుమితా రాయ్‌ చౌధరి తెలిపారు. ప్రస్తుతం నగరంలో 26లక్షల వాహనాలు ఉన్నాయి. ఏటా 2లక్షల కొత్త వాహనాలు రోడ్లపైకి వస్తున్నాయి. దానితో నగరంలో సరాసరి ప్రయాణ వేగం కూడా తగ్గుతోందని చెప్పారు. 1981లో గంటకు 17 కిలోమీటర్ల మేర వేగం ఉండేదని, 2006లో అది 12 కిలోమీటర్లకు పడిపోయిందని వివరించారు. వాహనాల సంఖ్య పెరగడం వల్లే నగరంలో కాలుష్యం పెరుగుతోందని తెలిపారు.

Read More

200 కోట్ల ఏళ్ల క్రితం భూమ్మీద బిగ్‌బ్యాంగ్‌

200 కోట్ల ఏళ్ల క్రితం భూమ్మీద బిగ్‌బ్యాంగ్‌
బహుకణజీవులు పుట్టింది అప్పుడే
ఐర్లాండ్‌ శాస్త్రవేత్తల వెల్లడి లండన్‌: మన శరీరం కొన్ని కోట్ల కణాల నిర్మితం. భూమ్మీదున్న అన్ని సంక్లిష్ట జీవరాశలదీ ఇదే తీరు. కోట్లకొద్ది కణాలు ఒక దానికొకటి కలిసి బహుకణ జీవుల ఆవిర్భావానికి అంకురార్పణ జరిగిందెప్పుడు? అసలు భూమ్మీద రెండు కణాలు కలిసిందెప్పుడు? ఈ మౌలిక ప్రశ్నకు ఐర్లాండ్‌ శాస్త్రవేత్తలు సమాధానం కనుక్కున్నారు. దాదాపు 200 కోట్ల ఏళ్ల క్రితం రెండు ఏకకణజీవులు కలిసి ఒకే కేంద్రకంతో కూడిన బహుకణజీవిగా ఏర్పడ్డాయని వారు అంచనా కట్టారు. విశ్వ ఆవిర్భావాన్ని సూచించే బిగ్‌బ్యాంగ్‌ మాదిరిగా దీన్ని 'ప్రకృతి బిగ్‌బ్యాంగ్‌' అని అభివర్ణిస్తున్నారు. ఐర్లాండ్‌ జాతీయ విశ్వవిద్యాలయానికి చెందిన డాక్టర్‌ మెక్‌ఎల్‌నెర్నీ నేతృత్వంలోని శాస్త్రవేత్తలు ఇంగ్లండ్‌లోని కేంబ్రిడ్జ్‌ విశ్వవిద్యాలయం సంగర్‌ సంస్థకు చెందిన జేమ్స్‌ కాటన్‌తో కలిసి పదేళ్లపాటు పరిశోధించి ప్రకృతి బిగ్‌బ్యాంగ్‌ను కనుక్కున్నారు. వీరి ప్రతిపాదన ప్రకారం.. 200 కోట్ల ఏళ్ల క్రితం ఏకకణ బ్యాక్టీరియా, ఏకకణ ఆర్కియెన్‌ కలిసి ఒకే కేంద్రకమున్న ఈస్ట్‌కు (శిలీంధ్రం) జన్మనిచ్చాయి. దీన్నించే పరిణామక్రమంలో కీటకాలు, వృక్షాలు, జంతువులు ఉద్భవించాయి. మనిషి పుట్టిందీ ఈ క్రమంలోనే. ఈ సంక్లిష్ట బహుకణ జీవరాశులను 'యూకరైట్లు' అని శాస్త్రీయ పరిభాషలో పిలుస్తారు. ఈస్ట్‌ జన్యుక్రమం విశ్లేషణ ఆధారంగా నెర్నీ, కాటన్‌ల బృందం భూమ్మీద జరిగిన మొట్టమొదటి కేంద్రక సంలీనాన్ని గుర్తించింది. 'ఏ జీవజాతి డీఎన్‌ఏ సమాచారమైనా దాని కేంద్రకంలో ఉంటుంది. అసలు ఒక కేంద్రకం మొదటిసారిగా ఎలా ఏర్పడిందన్నది ఇప్పటివరకూ రహస్యంగానే ఉంది. ప్రస్తుతం మనకు ఆ విషయం తెలిసింది' అని మెక్‌ఎల్‌నెర్నీ చెప్పారు.

Read More

ఆర్కిటిక్‌ మంచుమాయం

ఆర్కిటిక్‌లో మంచు పొర తగ్గుతోంది. ఆర్కిటిక్‌ సముద్ర మంచు వేసవిలో కరుగుతుంది.  శీతాకాలంలో మళ్లీ పేరుకోవటం  సాధారణమే. అయినా, గత 30 ఏళ్లుగా ప్రమాదకర స్థాయిలో మంచు పొర తగ్గుతోందని శాస్త్రవేత్తలు పేర్కొన్నారు. ఈ వేసవిలో మూడో అత్యల్ప స్థాయికి చేరింది. రాబోయే 20-30 ఏళ్లలో వేసవి సమయంలో ఆర్కిటిక్‌ మంచురహిత ప్రాంతంగా మారే అవకాశం ఉందని శాస్త్రవేత్తలు చెబుతున్నారు. ఈ ప్రాంతంలో వేసవి సీజన్‌లో మంచు కరిగే ముప్పు పెరుగుతోందని కొలరాడోలోని జాతీయ మంచు గణాంక కేంద్రం శాస్త్రవేత్తలు పేర్కొన్నారు. 

Read More

రైలు ప్రమాద నిరోధక పరికరం సిద్ధం

పట్టాలపై ఎదురెదురుగా వస్తున్న రైళ్లు ఢీకొనకుండా నిరోధించే పరికరం సిద్ధమైందని  రైల్వేశాఖ మంత్రి మమతా బెనర్జీ తెలిపారు. త్వరలో దానిని అందుబాటులోకి తేనున్నామని మమతా బెనర్జీ తెలిపారు. దీంతోపాటు అత్యాధునిక సిగ్నలింగ్‌ వ్యవస్థనూ ప్రవేశపెట్టబోతున్నామని చెప్పారు. ఇవి రెండూ అందుబాటులోకి వస్తే రైలు ప్రమాదాలను గణనీయంగా తగ్గించవచ్చని అక్టోబర్ 7 వ తేదీన ఆమె ఒక సమావేశంలో వెల్లడించారు.

Read More

జాబిల్లిపైకి చైనా ఉపగ్రహం

చంద్రుడిపైకి చైనా మరో ఉపగ్రహాన్ని పంపింది. ఛాంగే-2 అనే ఈ ఉపగ్రహాన్ని సిచువన్‌ ప్రాంతంలోని జిచాంగ్‌ ఉపగ్రహ ప్రయోగ కేంద్రంనుంచి ప్రయోగించారు. ఉపగ్రహం ప్రయోగించిన 20 నిమిషాల్లో కక్ష్యలోకి విజయవంతంగా ప్రవేశించినట్లు శాస్త్రవేత్తలు తెలిపారు. ఇది ఐదు రోజుల్లో చంద్రుని కక్ష్యా వేగాన్ని అందుకుంటుందన్నారు. ఉపగ్రహాన్ని 54.84 మీటర్ల పొడవు, 345 టన్నుల బరువున్న 3సీ రాకెట్‌తో ప్రయోగించినట్లు చెప్పారు. 2013లో చంద్రుడిపైకి మానవుడిని పంపాలని చైనా లక్ష్యంగా నిర్ణయించింది.

Read More

ప్రతి పంచాయతీలో 17 వేల మొక్కలు

మూడేళ్లలో 31 కోట్ల మొక్కల్ని నాటాలన్న లక్ష్యంతో, రూ.500 కోట్లతో రాష్ట్రంలోని అన్ని ప్రాంతాల్ని పచ్చగా మార్చడానికి రాష్ట్ర ప్రభుత్వం ప్రణాళికను సిద్ధంచేసింది. మూడేళ్లలో ప్రతి గ్రామ పంచాయితీలో 17 వేల మొక్కలను నాటే కార్యక్రమం కార్యరూపం దాల్చబోతోంది. మొత్తంమీద 31 కోట్ల మొక్కల్ని నాటే కార్యక్రమాన్ని అటవీ, గ్రామీణాభివృద్ధి శాఖలు చేపట్టబోతున్నాయి. రాష్ట్రంలోని 65 లక్షల హెక్టార్ల అడవుల్లో దాదాపు 30 లక్షల హెక్టార్లలో అడువులు అంతరించిపోయే పరిస్థితి ఏర్పడి పర్యావరణ సమతుల్యత దెబ్బతినే ప్రమాదం ఏర్పడింది. ఈ నేపథ్యంలో వచ్చే మూడేళ్లలో భారీగా మొక్కలు నాటే కార్యక్రమాన్ని మొదలుపెట్టాలని రాష్ట్ర ప్రభుత్వం నిర్ణయించింది. పచ్చని వనాలను పెంపొందించేందుకు గ్రామీణ ఉపాధి హామీ పథకం కింద అటవీ శాఖకు రూ.500 కోట్లను కేటాయించారు.  మహాత్మాగాంధీ గ్రామీణ నర్సరీ  పేరిట ప్రతి మండలంలో నాలుగు నర్సరీల చొప్పున మొత్తం 4,604 నర్సరీలను ఏర్పాటుచేస్తారు.  ప్రతి నర్సరీలో 70 వేల నుంచి 80 వేల మొక్కల్ని పెంచుతారు. టేకు, నీలగిరి, వెదురు, నేరేడు, తుమ్మ, ఎర్రచందనం, ఉసిరి, కానుగ, వేప, సుబాబుల్‌ మొక్కలను పెంచుతారు. ప్రతి నర్సరీకి ఒక వనసేవక్‌, 20 నర్సరీలకు ఒక పోగ్రాం అసిస్టెంటెంట్‌లను నియమించనున్నారు. నిర్ణయించిన కొలతలతో గొయ్యి తీసి బంజరు భూముల్లో గానీ, రోడ్డు పక్కన గానీ మొక్కలు ఎవరు నాటినా ఉపాధి హామీ పథకం కింద నిధులను వీరికి అందజేయనున్నారు. చెరువుల పూడికతీతతో పాటు ఇతరత్రా ఉపాధి పనుల్లాగే దీన్ని కూడా ఉపాధి పథకంలోకి తీసుకువచ్చి మొక్కలను నాటే కార్యక్రమాన్ని చేపట్టనున్నారు. మొక్కలు నాటాక వీటి సంరక్షణ బాధ్యతను డివిజనల్‌ ఫారెస్టు అధికారులతో పాటు జిల్లా నీటిపారుదల యాజమాన్య సంస్థ అధికారులు చేపడతారు.

Read More

క్రీడా సంబరం 'కామన్‌వెల్త్‌'

భారత రాష్ట్రపతి ప్రతిభాపాటిల్‌, బ్రిటన్‌ యువరాజు చార్లెస్‌ చేతుల మీదుగా కామన్వెల్త్‌ క్రీడల ఆరంభ వేడుకలు ప్రారంభమయ్యాయి. ఈ అద్భుత ఘట్టానికి ఢిల్లీలోని జవహర్‌లాల్‌ నెహ్రూ స్టేడియం వేదికగా నిలిచింది. 28 ఏళ్ల కింద ఆసియా క్రీడలను నిర్వహించిన భారత్‌ ఇపుడు కామన్వెల్త్‌ క్రీడల ప్రారంభ వేడుకల్ని అట్టహాసంగా నిర్వహించింది. ౩ అక్టోబరు సాయంత్రం వేళ జవహర్లాల్‌ నెహ్రూ స్టేడియంలో రూ.44 కోట్లతో ఏర్పాటుచేసిన బెలూన్‌ ఆకారపు ఏరోస్టాట్‌ తెరను ఆకాశంలోకి ఎత్తగానే ప్రాంగణమంతా స్వర్ణకాంతులు పరచుకున్నాయి.  కామన్‌వెల్త్‌ దేశాల అధినేత ఎలిజబెత్‌ రాణి తరఫున బ్రిటన్‌ యువరాజు ఛార్లెస్‌, భారత రాష్ట్రపతి ప్రతిభా పాటిల్‌ స్టేడియంలోని 60 వేలమంది ప్రేక్షకుల సమక్షంలో ఈ కార్యక్రమాన్ని లాంఛనంగా ఆరంభించారు. ఈ క్రీడల్ని బ్రిటిష్‌ రాణి ప్రారంభించకపోవడం గత 44 ఏళ్ల కాలంలో ఇదే మొదటిసారి. యువరాజు ఛార్లెస్‌, రాష్ట్రపతి ప్రతిభా పాటిల్‌ ఏకకాలంలో ఈ క్రీడల్ని ప్రారంభించాలన్న దౌత్యపరమైన ఒప్పందం మేరకు ఆదివారం ఒకే వేదికపై నుంచి ఇరువురూ క్రీడల ప్రారంభ సూచకంగా ప్రకటన చేశారు.
ప్రధాని మన్మోహన్‌సింగ్‌, కేంద్ర మంత్రులు, మాజీ రాష్ట్రపతి అబ్దుల్‌ కలాం, కాంగ్రెస్‌ అధ్యక్షురాలు సోనియాగాంధీ, ఏఐసీసీ ప్రధాన కార్యదర్శి రాహుల్‌గాంధీ, ముఖ్యమంత్రి షీలాదీక్షిత్‌, అంతర్జాతీయ ఒలింపిక్‌ అసోసియేషన్‌ అధ్యక్షుడు జాక్విస్‌ రోగ్‌, భారత్‌ ఒలింపిక్‌ సంఘం అధ్యక్షుడు సురేశ్‌ కల్మాడీ, వివిధ దేశాధినేతలు హాజరయ్యారు. సంస్కృతి, ఆధునికత కలగలిసిన కార్యక్రమాలు 2 గంటలపాటు ప్రేక్షకుల్ని కట్టిపారేశాయి. 70 వేల కోట్ల రూపాయల ఈ మెగా కార్యక్రమం ఇది.  పన్నెండు రోజులపాటు జరిగే క్రీడా పండుగలో 71 దేశాలకు చెందిన ఏడువేల మంది క్రీడాకారులు పోటీ పడుతున్నారు.
1050 మంది పాఠశాల విద్యార్థుల నమస్తే నృత్య ప్రదర్శనను 23 భారతీయ భాషల్లో ఏరోస్టాట్‌లో ఆవిష్కరించారు. క్రీడాకారుల పెరేడ్‌ 71 మంది మహిళలతో ప్రారంభమైంది. అంతా చీరలు కట్టుకొని భారతీయతను, చీరల రంగుల్లో వారివారి దేశాల పతాకాలను ప్రతిబింబించారు. ఒలింపిక్‌ పతకాన్ని గెలుచుకున్న అభినవ్‌ బింద్రా సారథ్యంలో 619 మంది సభ్యుల భారత బృందం ప్రాంగణంలోకి వచ్చినపుడు కేరింతలు కొట్టారు.   71 దేశాల క్రీడాకారుల మార్చ్‌ సాగింది. హైదరాబాద్‌ బ్యాడ్మింటన్‌ తార సైనా నెహ్వాల్‌, బాక్సింగ్‌ వీరుడువిజేందర్‌సింగ్‌, కుస్తీ యోధుడు సుశీల్‌ కుమార్‌లు బ్యాటన్‌ను మోసిన వారిలో ఉన్నారు. అనంతరం అన్ని దేశాల పతాకాలు ప్రాంగణంలోకి రాగా, భారత కెప్టెన్‌ బింద్రా ప్రమాణస్వీకారం చేశారు. 816 మంది ప్రదర్శనకారులు చేసిన సూర్య నమస్కారాలు, క్లిష్టమైన ఆసనాలు అలరించాయి.

Read More

పొడుపు కథల జవాబులు

కిట కిట తలుపులు, కిటారి తలుపు, ఎప్పుడు తీసిన చప్పుడు కావు, ఏమిటవి?
విప్పితే: కనురెప్పలు!
 ల జవాబులు
మామ కాని మామ, ఎవ్వరది?
విప్పితే: చందమామ!

చుట్టింటికి మొత్తే లేదు
జవాబు: కోడి గుడ్డు

నల్ల బండ క్రింద నలుగురు దొంగలు
జవాబు: బర్రె(గేదె, ఎనుము) క్రింది పొదుగులు

అమ్మ అంటే కదులుతాయి, నాన్న అంటే కదలవు
జవాబు: పెదవులు

అమ్మ అంటే కలుస్తాయి, నాన్న అంటే కలవవు
జవాబు: పెదవులు

అడవిలో పుట్టింది, అడవిలో పెరిగింది, మా ఇంటికొచ్చింది, తైతక్కలాడింది
విప్పితే: కవ్వము!

తెల్లటి బంతి చల్లని బంతి అందని బంతి ఆడని బంతి
జవాబు: జాబిలి

దేశదేశాలకు ఇద్దరే రాజులు
జవాబు: సూర్యుడు, చంద్రుడు

చిటారు కొమ్మన మిఠాయి పొట్లం
జవాబు: తేనెపట్టు

తోక లేని పిట్ట తొంభై ఆమడలు పోతుంది
జవా:ఉత్తరం

ఆకాశాన అంబు, అంబులో చెంబు, చెంబులో చారెడు నీళ్ళు
జవాబు: టెంకాయ

అరచెయ్యంత పట్నంలో అరవై గదులు; గదికొక్క సిపాయి; సిపాయికొక్క తుపాకీ
జవాబు: తేనె పట్టు

తెల్లటి పొలంలో నల్లటి విత్తనాలు: చేత్తో చల్లుతారు, నోటితో ఏరుతారు
జవాబు: పుస్తకంలో అక్షరాలు

వంరి వంకల రాజు, వళ్ళంతా బొచ్చు
జవాబు: పొలం గట్టు

ఇల్లంతా తిరుగుతుంది, మూలన కూర్చుంటుంది
జవాబు: చీపురు

పిడికెడంత పిట్ట! అరిచి గోల చేస్తుంది. ఎత్తుకుంటే చెవిలో గుసగుసలు చెబుతుంది.
జవాబు: టెలిఫోన్/సెల్ ఫోన్

మేసేది కాసంత మేత:
కూసేది కొండంత మోత.
జవాబు:తుపాకి/తూట

మూడు కళ్ళ ముసలిదాన్ని
నేనెవరిని?
జవాబు:తాటి ముంజ

బంగారు భరిణలో రత్నాలు:
పగుల గొడితేగాని రావు.
జవాబు:దానిమ్మ పండు.

పొంచిన దెయ్యం పోయిన చోటికల్లా వస్తుంది?
జవాబు:తన నీడ
మంచం కింద మామయ్యా:,
ఊరికి పోదాం రావయ్య.
జవాబు:చెప్పులు

పలుకుగాని పలుకు :
ఎమిటది?
జవాబు:వక్క పలుకు

నల్లని చేనులో
తెల్లని దారి ఏమిటది?
జవాబు:పాపిడి.

పచ్చ పచ్చని తల్లి:
పసిడి పిల్లల తల్లి:
తల్లిని చీలిస్తే
తియ్యని పిల్లలు
జవాబు:పనస పండు

పచ్చన్ని పొదలోన విచ్చుకోనుంది:
తెచ్చుకోబోతేను గుచ్చుకుంటుంది. ఏమిటది?
జవాబు:మొగలి పువ్వు

నోరులేని పిట్ట తోకతో నీళ్ళు తాగుతుంది.ఏమిటది?
జవాబు:దీపం వత్తి

అక్కడిక్కడి బండి అంతరాల బండి:
మద్దూరి సంతలోన మాయమైన బండి.
ఏమిటది?
జవాబు:సూర్యుడు.

అడవిని పుట్టాను,
నల్లగ మారాను:
ఇంటికి వచ్చాను,
ఎర్రగ మారాను:
కుప్పలో పడ్డాను,
తెల్లగ మారాను.
జవాబు:బొగ్గు

అడవిలో పుట్టింది,
అడవిలో పెరిగింది:
చెంబులో నీళ్ళని,
చెడత్రాగుతుంది.
జవాబు:గంధపుచెక్క

 అడవిలో పుట్టింది,
అడవిలో పెరిగింది;
మా ఇంటి కొచ్చింది మహలక్ష్మి.
ఎవరు ?
జవాబు:గడప

అడవిలో పుట్టింది,
అడవిలో పెరిగింది;
మా ఇంటి కొచ్చింది,
తైతక్కలాడింది.
ఎవరు?
జవాబు : మజ్జిగను చిలికే తెడ్డు.

అన్నదమ్ములం ముగ్గురం మేము,
శుభవేళల్లో కనిపిస్తూ వుంటాము:
అయితే బుద్ధులు వేరు --
నీళ్ళలో
మునిగే వాడొకడు:
తేలే వాడొకడు;
కరిగే వాదొకడు:
అయితే మే మెవరం?
జవాబు: ఆకు, వక్క, సున్నం.

అమ్మ కడుపున పడ్డాను,
అంత సుఖమున్నాను:
నీచే దెబ్బలు తిన్నను,
నులువునా ఎండిపోయాను:
నిప్పుల గుండం తొక్కాను:
గుప్పెడు బూడిదనైనాను.
జవాబు:పిడక

ఆకసమంతా అల్లుకు రాగా:
 చేటెడు చెక్కులు చెక్కుకు రాగా:
కడివెడు నీరు కారుకు రాగా:
అందులో ఒక రాజు ఆడుతుంటాడు.
జవాబు: గానుగ

 ఆకాశ పక్షి ఎగురుతూ వచ్చి,
కడుపులో చొచ్చి లేపింది పిచ్చి.
జవాబు:కల్లు

ఆమడ నడిచి అల్లుడొస్తే,
మంచం కింద ఇద్దరూ,
గోడ మూల ఒకరూ,
దాగుకున్నారు.
జవాబు: చెప్పుల జోడు, చేతి కర్ర

ఇంతింతాకు బ్రహ్మంతాకు
పెద్దలు పెట్టిన పేరంటాకు.
జవాబు: మంగళ సూత్రం

ఇంతింతాకు ఇస్తరాకు
రాజులు మెచ్చిన రత్నాలాకు.
జవాబు: తామలపాకు.

ఇక్కడి నుంచి చూస్తే యినుము;
దగ్గరికి పోతే గుండు;
పట్టి చూస్తే పండు;
తింటే తీయగనుండు.
జవాబు: తాటిపండు.

ఊరంతకీ ఒక్కటే దుప్పటి
జవాబు: ఆకాశం

ఊరంతా నాకి మూల కూర్చుండేది - యేది?
జవాబు: చెప్పులు
ఇల్లంతా నాకి మూల కూర్చుండేది - యేది?
జవాబు: చీపురు

ఊళ్ళో కలి,
వీధిలో కలి,
ఇంట్లో కలి,
ఒంట్లో కలి.
జవాబు: చాకలి, రోకలి, వాకలి, ఆకలి.
ఎక్కలేని మానుకి దుక్కిలేని కాపు.
జవాబు: మిరపచెట్టు.

ఏడుగురు అన్నదమ్ములం మేము;
విడివిడిగా వుంటే చెప్పలేవు ,
కలసి వుంటే చెప్పగలవు.
జవాబు: ఇంద్రధనస్సు

తండ్రి గరగర,
తల్లి పీచుపీచు,
బిడ్డలు రత్నమాణిక్యాలు,
మనుమలు బొమ్మరాళ్ళు.
జవాబు: పనసకాయ

గోడమీద బొమ్మ
గొలుసుల బొమ్మ
వచ్చి పోయే వారికి
వడ్డించు బొమ్మ.
జవాబు: తేలు.

చెయ్యని కుండ పొయ్యని నీళ్ళు, వెయ్యని సున్నం తియ్యగ నుండు.
జవాబు: టెంకాయ .

ఇంతింత బండి - ఇనప కట్ల బండి , తొక్కితే నా బండి - తొంభై ఆమడలు పోతుంది.
జవాబు: సైకిలు డబ్బా నిండ ముత్యాలు,డబ్బాకు తాళం. ఏమిటది ? జవాబు: దానిమ్మ కాయ.

పళ్ళెంలో పక్షి - ముక్కుకు ముత్యం, తోకతో నీరు - త్రాగుతుంది మెల్లగా
జవాబు: దీపం

అయ్య అంటే కలవవు, అమ్మ అంటే కలుస్తాయి
జవాబు:పెదవులు

నీలము చీర, మధ్యలో వెన్న ముద్ద, అక్కడక్కడ అన్నపు మెతుకులు
జవాబు : ఆకాసములో చంద్రుడు, చుట్టూ నక్షత్రాలు
వ్రేలిమీద నుండు వెండుంగరము కాదు - వ్రేలిమీద నుండి నేలజూచు
అంబరమున దిరుగు నది యేమిచోద్యమో - విశ్వదాభిరామ వినురవేమ !
జవాబు : గాలిపటం

మూడు శిరములున్ను ముదమొప్ప పది కాళ్ళు - కల్గు తోకలు రెండు కన్ను లారు
చెలగి కొమ్ములు నాల్గు చెతులు రెండయా - దీని భావమేమి తిరుమలేశ  !
జవాబు: నాగలిదున్నే రైతు/-------- ( ఒంకర టింకర -అ, వాని తమ్ముడు -సొ,నల్లగుడ్ళ-- మి, నాలుగు కాళ్ళ--మె,)

Read More

భూమిని పోలిన గ్రహం

భూమి లాంటి గ్రహం మరొకటి ఉందని శాస్త్రవేత్తలు గుర్తించారు.  ఈ గ్రహం భూమికి 20 కాంతి సంవత్సరాల దూరంలో ఉన్న ఒక తార చుట్టూ పరిభ్రమిస్తున్నట్లు కాలిఫోర్నియా విశ్వవిద్యాలయానికి చెందిన శాస్త్రవేత్తలు గుర్తించారు. దీనికి గ్లీస్‌ 581జీ అని పేరు పెట్టారు. ఈ గ్రహం భూమి కంటే 3 రెట్లు పెద్దగా ఉంది. ఈ గ్రహంపై రాత్రి, పగలు ఉండవు. ఈ గ్రహం పై  భూమి తరహాలో వాతావరణం, గురుత్వాకర్షణ శక్తి ఉన్నట్లు శాస్త్రవేత్తలు గుర్తించారు.  జీవం మనగడకు అనువైన పరిస్థితులూ ఉన్నాయని నీరూ ఉండొచ్చని చెప్పారు.  హవాయ్‌లోని డబ్ల్యూఎం కెక్‌ అబ్జర్వేటరీలో 11 ఏళ్ల పాటు పరిశీలనలు జరిపి ఈ గ్రహం తీరుతెన్నులను గమనించారు.

Read More

ఐదులక్షల కోట్ల వరకూ 'పై' లెక్కింపు

గణితశాస్త్రంలో వృత్తం చుట్టుకొలత, వ్యాసం నిష్పత్తినే 'పై' అంటారు. దీనిని 22/7గా పేర్కొంటారు. 'పై'ని ఎంత భాగించినా శేషం వస్తూనే ఉంటుందని మనకు తెలుసు. జపాన్‌కు చెందిన ఒక ఇంజినీర్‌ సొంతంగా రూపొందించిన కంప్యూటర్‌ను ఉపయోగించి 'పై' విలువను ఐదులక్షల కోట్ల (ఐదు ట్రిలియన్లు) వరకూ లెక్కించారు.  ఒక ఫ్రెంచి ఇంజినీర్‌ గత ఏడాది నమోదు చేసిన రికార్డును (2.7 ట్రిలియన్లు) బద్దలు కొట్టారు. ఒక ఆహార ఉత్పత్తుల సంస్థలో ఇంజినీర్‌గా పని చేస్తున్న షిగెరు కొండొ 'పై' విలువను వీలైనన్ని ఎక్కువ స్థానాల వరకూ లెక్కించటానికి కొన్నేళ్లుగా ప్రయత్నిస్తున్నారు. దీనికోసం 32 టెరాబైట్ల హార్డ్‌డ్రైవ్‌తో సొంతంగా కంప్యూటర్‌ను తయారుచేశారు. అనంతరం 5ట్రిలియన్ల స్థానాలవరకూ పై విలువను లెక్కించారు.

Read More

బడికిపోయి చదువుతా !

నేనూ పెద్దవాడినయితే 
పక్క ఇంటి పిల్లవాడు
'బాబ్జీ' అంతవుతా!
వాడివెంట నేను కూడ బడికిపోయి చదువుతా !
పలకమీద అకరాలు పట్టి పట్టి దిద్దుతా !
అచ్చు లాగా రాసుకొచ్చి అమ్మకు చూపిస్తా !
'అల,వల, తల, కల' అన్ని పేర్లు చదువుతా!
అడగగానే మేష్టారికి అప్పచెప్పి తీరుతా !
ఎంత పెద్ద పద్యమైన అంతలోనె వల్లిస్తా !
తడబడకుండా వడిగా తరగతిలో పాడుతా !
గుక్క తిప్పకుండ నేను ఎక్కాలను చదువుతా !
ఒక్క తప్పు లేకుండా లెక్కలన్ని చేస్తా !
నేను పెద్ద పరీక్షలకు నిద్రమాని చదువుతా !
పట్టు పట్టి తరగతిలో 
ఫస్టున ప్యాసవుతా !

Read More

దేశంలో తొలి విశిష్ట గుర్తింపు సంఖ్య జారీ

 782474317884... 

ఈ పన్నెండంకెల సంఖ్య - కేంద్ర ప్రభుత్వం ప్రతిష్ఠాత్మకంగా చేపట్టిన 'ఆధార్‌' ప్రాజెక్టులో భాగంగా జారీ చేసిన మొట్టమొదటి విశిష్ట గుర్తింపు (యూఐడీ) సంఖ్య. మహారాష్ట్రకు చెందిన రజనా సోనావానే అనే గిరిజన మహిళకు ఈ సంఖ్యను కేటాయించారు. దీంతో రజనా దేశంలోనే మొదటి విశిష్ట గుర్తింపు సంఖ్యను పొందిన మహిళగా నిలిచారు. ఈ సంఖ్యే ఆమెకు జీవితాంతం అధికారిక గుర్తింపుగా ఉండిపోతుంది. ఇదే విధంగా భారత దేశం లోని పౌరులందరికీ విశిష్ట గుర్తింపు (యూఐడీ) సంఖ్యను కేటాయించనున్నారు. 

ప్రధాని మన్మోహన్‌సింగ్‌, యూపీఏ ఛైర్‌పర్సన్‌ సోనియాగాంధీలు 29 సెప్టెంబర్ న నందర్బార్‌ జిల్లాలోని తెంబ్లీ గిరిజన గూడెంలో 'ఆధార్‌' ప్రాజెక్టును ప్రారంభించారు.  ఈ కార్యక్రమంలో కార్డుల రూపశిల్పి 'యునీక్‌ ఐడెంటిఫికేషన్‌ అథారిటీ ఆఫ్‌ ఇండియా' చీఫ్‌ నందన్‌ నిలేకని కూడా పాల్గొన్నారు.  ''చాలామంది పేదలకు ఎలాంటి గుర్తింపు ఆధారాలు లేవు. దీంతో వారు బ్యాంకులో ఖాతా తెరవడానికైనా, రేషన్‌ పొందడానికైనా ఇబ్బంది పడాల్సిన పరిస్థితి. ప్రభుత్వ సంక్షేమ పథకాల నుంచి లబ్ధినీ పొందలేకపోతున్నారు. అవన్నీ దారిమళ్లి దళారులు, ఇతరుల జేబుల్లోకి వెళుతున్నాయి. ఈ కార్డులతో ఆ సమస్యలు తొలగుతాయి'' అని ఈ సందర్భంగా  ప్రధాని మన్మోహన్‌సింగ్‌ పేర్కొన్నారు.

Read More

ప్రధాన సమాచార కమిషనర్‌గా ఏఎన్‌ తివారీ

ప్రస్తుతం సమాచార కమిషనర్‌గా ఉన్న అనుగ్రహ నారాయణ్‌ తివారీ కేంద్ర ప్రధాన సమాచార కమిషనర్‌గా నియమితులయ్యారు. 1969 బ్యాచ్‌, ఆంధ్రప్రదేశ్‌ క్యాడర్‌కు చెందిన ఈ మాజీ ఐఏఎస్‌ అధికారి గతంలో సుదీర్ఘకాలం పాటు రాష్ట్రంలో పనిచేశారు. ప్రస్తుతం ప్రధాన సమాచార కమిషనర్‌గా ఉన్న వజహత్‌ హబీబుల్లా ఐదేళ్ల పదవీకాలం ముగియడంతో పదవీ విరమణ చేశారు. పార్టీల ఆదాయపు పన్ను రిటర్నులను ప్రజలు పరిశీలించవచ్చన్నది సమాచార కమిషనర్‌గా తివారీ తీసుకొన్న కీలక నిర్ణయాల్లో ఒకటి. 1945 డిసెంబరు 19న ఒరిస్సాలో జన్మించిన తివారీ నల్గొండజిల్లా భువనగిరి సబ్‌కలెక్టరుగా పనిచేశారు. తర్వాత గుంటూరులో వాణిజ్య పన్నుల విభాగం ఉప కమిషనర్‌గా, కడప, వరంగల్‌ జిల్లాల కలెక్టర్‌గా బాధ్యతలు నిర్వర్తించారు. మాస్కోలోని భారత రాయబార కార్యాలయంలో కౌన్సెలర్‌గా వ్యవహరించారు. తర్వాత రాష్ట్ర ప్రభుత్వ కార్యదర్శిగా, గవర్నర్‌ కార్యదర్శిగా, ఉపరాష్ట్రపతి కార్యదర్శిగా పనిచేశారు.  2005 డిసెంబరు 25న ప్రభుత్వ సర్వీసు నుంచి పదవీ విరమణ చెందారు. అదే తేదీ నుంచి ఆయన కేంద్ర సమాచార కమిషన్‌లో సమాచార కమిషనర్‌గా కొనసాగుతున్నారు. ఆయన గురించిన మరింత సమాచారం కోసం ఇక్కడ చూడండి. 

Read More

ఓపెన్‌సోర్స్

ఓపెన్‌సోర్స్‌లో అందరికీ అన్నీ! పిల్లలకు ఆటలు.. విద్యార్థులకేమో పాఠాలు.. డిజైనర్లకు సాఫ్ట్‌వేర్‌లు.. ఉద్యోగులకు ఉచిత ఆఫీస్‌లు.. పెద్దలకు వీడియోలు.. పీసీ రక్షణకు ప్రత్యేక చిట్కాలు.. అన్నీ ఒకే చోటే! కొత్త పీసీ కొంటాం. ఎవరి ఆసక్తుల మేరకు ఇంట్లో పోటీ. ఆటల కోసం ఒకరు, ఉచిత సాఫ్ట్‌వేర్‌ల కోసం మరొకరు, సమాచారం కోసం ఇంకొకరు వెతుకులాట. మరయితే ఓపెన్‌ సోర్స్‌ కమ్యూనిటీ అందరి అవసరాలు తీర్చేలా సాఫ్ట్‌వేర్‌లు, వీడియో గేమ్స్‌, ఆఫీస్‌ అప్లికేషన్స్‌, సిస్టం సెక్యూరిటీ, మెదడుకు పదును పెట్టే ఆటలు... ఇలా అన్నీ ఒకేచోట అందిస్తోందని మీకు తెలుసా? అదే SchoolForge.net. ప్రధానంగా విద్యార్థులకు ఉపయోగపడే సాఫ్ట్‌వేర్‌లను రూపొందించడం దీని ప్రత్యేకత. ఉద్యోగుల ఆఫీస్‌ పనుల్ని మరింత సులభతరం చేసే అప్లికేషన్స్‌ అందుబాటులో ఉంచారు. సృజనాత్మకత కలిగి డిజైనింగ్‌ రంగాన్ని ఎంచుకునే విద్యార్థులకు మల్టీమీడియా అప్లికేషన్స్‌ పొందుపరిచారు. పీసీ సామర్థ్యాన్ని మరింత పెంచే యుటిలిటీ అప్లికేషన్స్‌ అందిస్తున్నారు. ఆటల్లోనే చదువు! పిల్లల కోసం విజ్ఞానదాయకమైన ఆటల్ని రూపొందించారు. ఉదాహరణకి సెలిస్టియా ఆటని ఆడుతూనే విశ్వం గురించి తెలుసుకోవచ్చు. సౌర కుటుంబాన్ని చుట్టేసి రావచ్చు. నక్షత్రాలు, గ్రహాలు, ఉల్కలు, ఉపగ్రహాల్ని ఎక్స్‌ప్లోర్‌ చేయవచ్చు. రెండు నుంచి పదేళ్ల పిల్లల్ని ఆకట్టుకునేందుకు GCompris కలెక్షన్‌ను రూపొందించారు. దీంట్లో క్విజ్‌లు, రంగుల్ని గుర్తించే ఆటలు, చదరంగం, బీజగణితం, భూగర్భశాస్త్రం, అంకెల గారడీ లాంటివి బోలెడు. ఆకర్షణీయమైన కార్టూన్లతో ఆటల్ని రూపొందించారు. అక్షరాల రూపంలో చేపలు పై నుంచి పడుతుంటాయి. వాటిని టైప్‌ చేస్తుంటే కింది ఉన్న పెంగ్విన్‌ వాటిని చక్కగా ఆరగించేస్తుంది. టక్స్‌మ్యాథ్స్‌ ఆటలో లెక్కలు చేయవచ్చు. టక్స్‌పెయింట్‌తో బొమ్మలు గీయొచ్చు. ఎక్కాల్ని కంఠస్తం చేయడానికి మల్టిప్లికేషన్‌ స్టేషన్‌ గేమ్‌ని తయారు చేశారు. మొత్తం ఆటల్ని లినక్స్‌, విండోస్‌, మ్యాక్‌ వెర్షన్లలో అందుబాటులో ఉంచారు. వివరాలకు http://tinyurl.com/education222 * మరిన్ని ఆటల కోసం http:// osswin. source forge.net/games.html సృజనాత్మకత ఉందా? ఆకట్టుకునేలా గ్రాఫిక్‌ని రూపొందించడం సృజనాత్మకతతో కూడిన కళ. ఇలాంటి గ్రాఫిక్స్‌ని 3డీలో క్రియేట్‌ చేయాలంటే వేల రూపాయలు పోసి మల్టీమీడియా సాఫ్ట్‌వేర్‌లు కొనక్కర్లేదు. ఇన్‌స్టాల్‌ చేసుకుంటే సరి! Art of Illusion త్రీడీ మోడలింగ్‌ సాఫ్ట్‌వేర్‌తో గ్రాఫిక్స్‌ని రూపొందించవచ్చు. ఓపెన్‌సోర్స్‌ గ్రాఫిక్స్‌ ఎడిటర్‌గా పేరొందించిన మరో మల్టీమీడియా సాఫ్ట్‌వేర్‌ Inkscape. ప్రస్తుతం మార్కెట్‌లో అందుబాటులో ఉన్న కొరల్‌డ్రా, Adobe Illustrator, Xara X... లాంటి కమర్షియల్‌ సాఫ్ట్‌వేర్‌లతో సమానంగా దీన్ని వాడుకోవచ్చు. సరికొత్త ఆప్షన్లతో మెనూబార్‌, టూల్‌బార్‌లను ఏర్పాటు చేశారు. మరోవైపు కొత్త వెర్షన్‌తో డిజైనర్లను ఆకర్షిస్తున్న బ్లెండర్‌ 2.52 బీటాతో మరింత ఆకర్షణీయంగా డిజైన్లు రూపొందించవచ్చు. తెరపై మీరు చేస్తున్న పనిని ఆడియో, వీడియో రూపంలో రికార్డ్‌ చేయాలంటే CamStudioతో చేయవచ్చు. వివిధ ఫార్మెట్‌ల్లో ఉన్న వీడియోలను ఎడిట్‌ చేసుకునేందుకు Avidemux నిక్షిప్తం చేశారు. http://tinyurl.com/multimedia222 * మరిన్ని ఉచిత సాఫ్ట్‌వేర్‌లకు www.opensourcewindows.org ఉద్యోగులకు ప్రత్యేకం ఇంట్లో ఆఫీస్‌ డాక్యుమెంట్‌లను తయారు చేయాలంటే ఎమ్మెస్‌ ఆఫీస్‌ను కొనక్కర్లేదు. NeoOffice డౌన్‌లోడ్‌ చేసుకుని వర్డ్‌, ఎక్సెల్‌, పవర్‌ పాయింట్‌ ప్రజంటేషన్స్‌ను తయారు చేయవచ్చు. ఇప్పటికే అనేక మందికి సుపరిచితమైన 'ఓపెన్‌ఆఫీస్‌' కూడా పొందొచ్చు. మైక్రోసాఫ్ట్‌ వర్డ్‌లో మాదిరిగానే డాక్యుమెంట్‌ను రూపొందించాలంటే Abiword నిక్షిప్తం చేసుకోండి. వ్యాపారానికి సంబంధించిన ఆర్థిక వ్యవహారాల్ని నమోదు చేసేందుకు GNUCash డౌన్‌లోడ్‌ చేసుకోవచ్చు. పీడీఎఫ్‌ ఫైల్స్‌ని సులభంగా వీక్షించేందుకు సుమత్రా పీడీఎఫ్‌ పొందొచ్చు. సన్‌బర్డ్‌ క్యాలెండర్‌ను కూడా ఇన్‌స్టాల్‌ చేసుకోవచ్చు. http://tinyurl.com/office-tools ఇలా పీసీ పరిరక్షణ పీసీకి రక్షణ వలయంలా పని చేసే యాంటీ వైరస్‌, స్పైవేర్‌లు ఓపెన్‌సోర్స్‌లో కూడా ఉన్నాయని తెలుసా? అయితే, ClamWin, Winpoochల గురించి తెలుసుకోవాల్సిందే. సాధారణ యాంటీ వైరస్‌ల మాదిరిగానే ఇవి పని చేస్తాయి. విండోస్‌ 7, విస్టా, ఎక్సెపీ, 2000, 98, విండోస్‌ సర్వర్‌ 2008, 2003 ఓఎస్‌ల్లో Clamwin యాంటీ వైరస్‌ను వాడొచ్చు. ప్రపంచవ్యాప్తంగా సుమారు 6,00,000 వినియోగదారులు వాడుతున్నారు. యాంటీవైరస్‌ అప్‌డేట్స్‌ని ఎప్పటికప్పుడు అప్‌డేట్‌ అయ్యేలా పెట్టుకోవచ్చు. షెడ్యూల్‌ స్కానింగ్‌ని కూడా ఏర్పాటు చేసుకోవచ్చు. ఇక winpooch తో ట్రోజన్స్‌, మాల్వేర్‌, స్పైవేర్‌ల పని పట్టొచ్చు. http://tinyurl. com/antivirus-spyware వీడియో ఏదైనా! ప్రపంచ వ్యాప్తంగా జరుగుతున్న విశేషాల్ని టీవీలో మాదిరిగా చూడాలనుకుంటే Miro Video Playerను దిగుమతి చేసుకోవచ్చు. ఇన్‌స్టాల్‌ చేసిన ప్లేయర్‌తో ఆన్‌లైన్‌ వీడియో షేరింగ్‌ సర్వీసుల్లోని వీడియోలను వెతికి వీక్షించవచ్చు. నచ్చిన వాటిని లైబ్రరీగా పెట్టుకోవచ్చు. హై డెఫినెషన్‌ వీడియోలకు కూడా అనువు. * ఒకవేళ ఆయా సాఫ్ట్‌వేర్‌లు స్కూల్‌ఫర్జ్‌ నుంచి డౌన్‌లోడ్‌ కాకుంటే వాటిని రూపొందించిన నిపుణుల సైట్‌ల నుంచి డౌన్‌లోడ్‌ చేసుకోండి. ఉదాహరణకు Gcompris ఎడ్యుకేషనల్‌ గేమ్‌ డౌన్‌లోడ్‌ కాకుంటే అదే పేరుతో గూగుల్‌ సెర్చ్‌లో వెతికి http://gcompris.net/-download- హోం సైట్‌ నుంచి దిగుమతి చేసుకోండి. * ఓపెన్‌సోర్స్‌ కమ్యూనిటీలో మీరు సభ్యులవ్వాలంటే www.schoolforge.net/education-software

Read More